За суспензија на реформата гласаа 255 претставници, додека 146 беа против.
Дебатата за буџетот доби дополнителна тежина бидејќи минатата година претседателот Емануел Макрон распиша предвремени избори кои доведоа до парламент без јасно мнозинство. Потоа владата на поранешниот премиер Мишел Барние падна поради буџетскиот предлог.
Франција, која смени пет премиери во последните две години, се соочува со најголемиот буџетски дефицит во еврозоната, поради што инвеститорите и европските партнери внимателно ја следат ситуацијата.
Иако парламентот го одобри прекинот на реформата, таа ќе стапи на сила само ако биде потврдена во законот за социјално осигурување.
Вториот обид на премиерот Себастијан Лекорну да ја стабилизира земјата досега донесе напредок, бидејќи делови од буџетот беа усвоени благодарение на отстапки кон социјалистите.
Најголемата отстапка беше замрзнувањето на планот на Макрон за зголемување на возраста за пензионирање на 64 години. Одлуката значи дека минималната возраст за пензионирање ќе остане на 62 години.
„Три и пол милиони Французи ќе можат да се пензионираат порано. Покажуваме дека се исплати да се обложува на консензус“, кажа пратеничката од социјалистите Мелани Томин.
Отстапките поврзани со пензиите и намалувањата веројатно ќе ја поткопаат целта на владата да се намали дефицитот за 30 милијарди евра, а конечниот предлог за буџетот сè уште не е објавен.
Сепак, како што се намалија шансите за пад на владата, така се намалуваат и трошоците за француско задолжување.
Претворањето на суспензијата во закон не е загарантирано, бидејќи левичарските сојузници се поделени, додека крајната левица и десница бараат нови избори.
Поранешниот премиер Габриел Атал најави дека центристичката партија на Макрон ќе биде воздржана наместо да гласа против.
„Јасно ни е дека суспензијата не е добра вест за француската економија“, кажа Атал во парламентот.
