„Ставот на Франција е јасен. Влезот на Западен Балкан, како и на Молдавија и Украина, е географски и политички императив за Европа. На Европа ѝ е потребна стабилност во контекст на разните мешања, па затоа проширувањето е императив“, оцени Адад.
Францускиот министер се обрати на конференција на тема „Дали проширувањето на Европската Унија е стратегиски избор? Франција, Западен Балкан и Европската Унија во неизвесен геополитички контекст“, одржана во Францускиот институт за меѓународни односи (ИФРИ) во Париз.
Адад кажа дека процесот на проширување е долг и тежок и дека земјите-кандидати треба да ги исполнат барањата за владеење на правото, да спроведат и почитуваат судски и економски реформи и да ги применат демократските вредности.
„Процесот на проширување е долг поради спроведувањето и почитувањето на реформите и нè забавува. Франција ги поддржува земјите-кандидати во економските и судските реформи, а исто така гледа дека сите имаат интереси во пазарна економија во Европа“, кажа Адад.
Според него, Франција е посветена на давање политички сигнали до земјите-кандидати дека се приближуваат кон ЕУ.
Адад додаде дека улогата на Франција е да го модернизира и прилагоди процесот на проширување на кандидатите за влез во ЕУ.
Тој смета дека е потребно продлабочување на внатрешната пазарна економија на ЕУ, соработка на одбранбениот план и создавање европска политичка заедница со цел обединување на сите цели.
„Неопходно е да се зајакне улогата на Западен Балкан во европската политичка заедница. Франција има богата соработка со тие земји, кои можат да сметаат на нејзината поддршка во моменти на сомнеж на земјите-кандидати“, кажа Адад и додаде дека процесот на проширување е долг, но реформите мора да бидат длабински, за ЕУ да биде посилна заедно со новите членки.
Виш соработник во организацијата Карнеги Јуроп, поранешниот извршен генерален секретар на Европската служба за надворешни работи (ЕЕАЦ), Пјер Вимон, изјави дека во Франција малку се зборува за процесот на проширување на ЕУ и дека француското јавно мислење и граѓаните не знаат како оди постапката и кои земји се кандидати.
Вимон изјави дека за неколку години Црна Гора веројатно ќе стане членка на ЕУ и многумина ќе бидат изненадени бидејќи знаат малку или речиси ништо за тоа.
Дебатите се неопходни во јавното мислење, но и во организацијата на политичките партии во Франција за да се избегне „чувство на изненадување“.
Вимон кажа дека Западен Балкан уште пред 26 години беше препозназен за влез во ЕУ, но впечаток е дека тоа се одложува и самите земји го забележуваат тоа, оценувајќи дека Унијата оди наназад по тој пат.
Потребно е да им се даде до знаење на земјите кандидати дека се потребни за стабилноста на ЕУ и да им се каже какви придобивки можат да добијат со приемот.
„Димензијата на геополитиката отсекогаш постоела, како кога земјите беа примени – Велика Британија или Португалија, и само тоа треба да биде поттик за зајакнување на процесот на проширување на ЕУ. Тој процес е долг и претставува предизвик за Европа“, додаде Вимон.
Советникот во ИФРИ, претседател на Француско-австрискиот центар за зближување во Европа (ЦФА), Доминик Давид, на конференцијата рече дека на Европа ѝ е потребна кохезија, но дека многу земји-кандидати за ЕУ веруваат дека долго чекаат за прием, особено земјите од Западен Балкан, кои сметаат дека долго време се „во чекалната“ на ЕУ.
Конференцијата беше организирана во контекст на војната на Русија и Украина, што го врати проширувањето на ЕУ во преден план на европските стратегиски дебати.
Во овој контекст, Западен Балкан повторно добива видливост во дискусиите за безбедноста на континентот, дури и додека меѓународната средина се карактеризира со ширење на дестабилизирачки фактори, според соопштението за медиумите на ИФРИ пред почетокот на конференцијата.
„Обидите за дестабилизација кои ѝ се припишуваат на Русија, зголемената употреба на економски инструменти од страна на Кина за целите на влијание и позиционирањето на Соединетите Американски Држави, кое се перцепира како непредвидливо, придонесуваат за посложен процес на донесување одлуки во Европа“, се наведува во текстот.
Соочен со овие случувања, францускиот став се чини дека се поместува кон стратегиски пристап кон проширувањето, кое се смета не само за проект на политичка интеграција, туку и како потенцијален лост за стабилноста и кредибилитетот на Унијата, додава ИФРИ.
Конференцијата е организирана во соработка со Европскиот фонд за Балканот (ЕФБ) и Советодавната група за политиката на Балканот во Европа (БИЕПАГ).
