Фон дер Лаен, по видео повикот со лидерите на Германија, Франција и Полска како дел од Берлинскиот формат, нагласи дека членството во Унијата „само по себе претставува клучна безбедносна гаранција“. „На крајот на краиштата, просперитетот на слободната украинска држава лежи во пристапувањето кон ЕУ“, објави таа на социјалните мрежи. „Пристапувањето не им користи само на земјите што пристапуваат; како што покажаа последователните бранови на проширување, тоа им користи и на самата Европа“.
Нејзините коментари следат по неделата интензивна дипломатска активност меѓу американските, украинските и европските претставници. Украинскиот претседател Володимир Зеленски, по средбата со американскиот претседател Доналд Трамп, изјави дека безбедносните гаранции меѓу трите страни се „скоро договорени“.
Иако се смета за клучен, процесот на пристапување кон ЕУ носи бројни предизвици. Членството бара обемни реформи и едногласно одобрување од сите 27 земји-членки. За Европската комисија пристапувањето на Украина претставува деликатна рамнотежа помеѓу спроведувањето на процесот базиран на заслуги, кој е еднаков за сите кандидати, и признавањето на вонредните околности во кои земјата се наоѓа среде преговорите.
Украина се соочува и со отпор од унгарскиот премиер Виктор Орбан, кој упорно тврди дека Киев не ги исполнува критериумите за членство и наместо тоа предлага само блиско партнерство. Неговото вето го блокираше секој напредок во преговорите за пристапување оваа година.
Иако Европската комисија тврди дека Украина е технички подготвена за напредок, фрустрацијата поради бавното темпо ги поттикна дискусиите за укинување на правилото за едногласност при одлучувањето за проширување, но тие предлози досега не се реализираа.
И покрај застојот во разговорите поради украинските напади врз резиденцијата на Путин, американскиот претседател изрази оптимизам за перспективите за мир, тврдејќи дека завршувањето на војната е во интерес на двете страни. Сепак, тој призна дека прашањето за можни територијални отстапки од страна на Киев, вклучувајќи ги и руските барања за контрола врз целиот регион Донбас, останува „многу тешко“ и нерешено прашање.
Трамп навести и дека Европа ќе мора да го сноси товарот на трошоците за безбедносните гаранции, но додаде дека и САД ќе помогнат. Во меѓувреме, холандскиот технички премиер Дик Шуф објави дека „Коалицијата на спремните“, група земји што ја поддржуваат Украина, ќе се состане следната недела.
Во понеделникот Зеленски им откри на новинарите дека предлогот е американските безбедносни гаранции да траат 15 години, но дека Киев бара нивно продолжување. Украинскиот претседател се залага за период од 30 до 50 години, тврдејќи дека, со оглед на руската агресија, тоа би била пресвртница за Украина. „Тоа би била историска одлука“, кажа тој.
