Финскиот закон за нуклеарна енергија од 1987 година забранува увоз, производство, поседување и детонирање нуклеарни експлозиви на финска почва, што некои Финци го сметаат за клаузула која би ѝ користела само на Русија доколку некогаш избувне војна.
Иако Финска ја задржа неутралноста за време на Студената војна, земјата се приклучи на западниот воени сојуз НАТО во 2023 година како реакција на руската инвазија на Украина во 2022 година.
„Амандманот е нужен за да се овозможи финската воена одбрана во рамките на алијансата и целосно да се искористат придобивките од одвраќањето и колективната одбрана на НАТО“, изјави финскиот министер за одбрана Анти Хакканен на прес-конференција. Предложената промена ќе оди во парламентот каде што десничарската коалициска влада има мнозинство.
Соседните земји Шведска, Данска и Норвешка имаат долгогодишна политика против нуклеарно оружје на своите територии во мирно време, но немаат законски забрани за време на војна.
Сојузниците од НАТО Франција и Германија во понеделникот објавија планови за продлабочување на соработката со европските партнери за нуклеарно одвраќање, промена на политиката додека континентот се справува со растечките закани од Русија и нестабилноста поврзана со конфликтот во Иран.
Според шведската доктрина, земјата не смее да стационира постојани странски војници или нуклеарно оружје на своја територија во мирно време, изјави премиерот Улф Кристерсон минатата недела на новинарите, кога беше прашан за можноста француско нуклеарно оружје да се најде во Шведска.
„Доколку се најдевме во сосема поинаква ситуација, таа специфична формулација не би била валидна“, кажа Кристерсон.
Финска има граница долга 1.340 километри со Русија. Хелсинки потпиша одбранбен договор со Соединетите Американски Држави пред две години, кој му дозволува на Вашингтон да користи 15 фински воени објекти и зони.
