Бродот кој оваа недела беше запленет во Финска под сомнение дека оштетил подводен телекомуникациски кабел превезувал руски челик под санкции на Европската Унија, потврдија финските власти. Инцидентот се случи во време на зголемени тензии во регионот на Балтичко Море, каде што земјите се во состојба на зголемена готовност поради низа оштетувања на клучната подводна инфраструктура, пишува Јуроњуз.
🇫🇮Finland has released a video of the seizure of a Russian “shadow fleet” vessel
Fitburg was detained after an act of sabotage — the ship damaged an undersea communications cable linking Finland and Estonia.
The vessel was traveling from St. Petersburg to Haifa carrying… pic.twitter.com/KQMUO7bIxj
— NEXTA (@nexta_tv) January 4, 2026
Во средата финската полиција го сопрела товарниот брод Фитбург, долг 132 метри, кој пловел од руски Санкт Петербург до израелското пристаниште Хаифа. Сите 14 членови на екипажот се приведени под сомнеж дека сидрото на бродот оштетило телекомуникациски кабел во Финскиот Залив.
Со проверка на товарот финската царина открила и потенцијално кршење на санкциите. „Прелиминарните информации укажуваат дека товарот се состоел од челични производи со потекло од Русија, кои се предмет на обемни санкции наметнати на Русија“, се наведува во соопштението на финската царина.
Експертите проценуваат дека градежниот челик пронајден на бродот спаѓа под секторските санкции на ЕУ, чиј увоз е забранет. „Увозот на таква санкционирана стока во ЕУ е забранет со регулативите на ЕУ за санкции“, истакнуваат царинските власти. Товарот е запленет до понатамошно известување, а започната е прелиминарна истрага за можно кршење на санкциите.
Полицијата го истражува инцидентот како сериозно кривично дело. Бродот Фитбург плови под знамето на Свети Винсент и Гренадини, а екипажот го сочинуваат државјани на Русија, Грузија, Азербејџан и Казахстан.
Двајца членови на екипажот биле уапсени во четврток, додека на двајца им е забрането патување, но полицијата не ги откри нивните националности или нивните задачи на бродот.
Во последниве години, енергетската и комуникациската инфраструктура во Балтикот, вклучувајќи ги подморските кабли и гасоводите, честопати се цел на оштетувања. Многу експерти и политичари тврдат, без какви било докази, дека сомнителната саботажа е дел од „хибридна војна“ која Русија ја води против западните земји по инвазијата на Украина во февруари 2022 година.
Шефицата за надворешни работи на ЕУ Каја Калас во четвртокот изјави дека Европа „останува будна“ бидејќи нејзината критична инфраструктура е „изложена на висок ризик од саботажа“.
„ЕУ ќе продолжи да ја зајакнува својата критична инфраструктура, вклучително и инвестирање во нови кабли, зајакнување на надзорот, обезбедување поголем капацитет за поправка и дејствување против „флотата во сенка“ на Москва, која исто така служи како платформа за хибридни напади“, напиша Калас на социјалната мрежа Икс.
Оштетениот кабел, кој се наоѓа во естонската ексклузивна економска зона, е во сопственост на финската телекомуникациска компанија Елиса. Компанијата соопшти дека услугите не биле прекинати за корисниците бидејќи сообраќајот бил успешно пренасочен.
Ова не е прв ваков случај. Во декември 2024 година, финските власти го запреа нафтениот танкер Игл С поврзан со Русија под сомнение дека оштетил енергетски и телекомуникациски кабли со влечење сидра на морското дно. Тој случај беше отфрлен од финскиот суд во октомври бидејќи обвинителите не успеале да докажат намера.
Осум земји-членки на НАТО се граничат со Балтичко Море, како и со Русија, и се во состојба на зголемена готовност. Наводните инциденти, кои во голема мера се промовираат како намерна саботажа, се изговор за НАТО да го зголеми своето присуство во регионот со патролни фрегати, авиони и поморски беспилотни летала.
