Помеѓу 19 и 22 мај, властите од неколку земји: срушија околу 300 сервери низ целиот свет, неутрализираа 650 домени, издадоа 20 меѓународни потерници и запленија 3,5 милиони евра во криптовалути.
Оваа операција е продолжение на најголемата меѓународна акција против ботнет од мај 2024 година. Овој пат фокусот беше на малверите за почетен пристап на алатките што хакерите ги користат за неприметно да влезат во системот и да го подготват теренот за рансомвер напади.
Рансомвер нападите се форма на сајбер криминал во кој напаѓачите ги заклучуваат податоците на жртвата и бараат откуп во замена за повторно отклучување. Вообичаени цели се болници, училишта, бизниси и локални самоуправи.
Малвер е општ термин за малициозен софтвер што се користи за инфилтрирање, кражба на податоци или саботажа на компјутерски системи.
„Го погодивме самиот извор на нападите“, соопшти Европол.
За време на операцијата неутрализирани се следните познати малвери: бамблби, лактродектус, какбот, данабот, трикбот, вормкуки.
Овие типови на малициозен софтвер често се продаваат како услуга на други криминалци, кои ги користат за да се инфилтрираат во мрежите на жртвите пред да започнат големи рансомвер напади.
Германските власти објавија дека 18 клучни осомничени ќе бидат додадени на листата на најбарани лица на ЕУ од 23 мај.
Се сомнева дека тие се одговорни за развојот и дистрибуцијата на малверите со кои криминалните групи добивале пристап до мрежите на жртвите.
Следниот голем извештај на Европол за сајбер криминал – ИОКТА 2025, кој ќе биде објавен на 11 јуни, ќе има посебен фокус на посредниците за почетен пристап, најавува Европол. Ова се луѓе или групи кои продаваат пристап до компромитирани мрежи, што често е првиот чекор во синџирот на дигитален напад.
„Оваа фаза ја покажува способноста на полицијата да се адаптира и да возврати дури и кога криминалците се реорганизираат“, изјави Катерина Де Боле, извршна директорка на Европол.
„Со разбивањето на клучните услуги што ги користат рансомвер групите, го прекинуваме синџирот на напади на самиот извор.“
Во текот на неделните операции, во седиштето на Европол во Хаг беше формиран команден центар, каде што истражители од Канада, Данска, Франција, Германија, Холандија, Велика Британија и САД работеа заедно со експерти од Европол и Евроџаст.
