„Офанзивата ќе доведе до поголемо уништување, повеќе смртни случаи и поголемо раселување“, изјави портпаролот на Европската комисија, Анвар Ел Ануни. „Тоа, исто така, ќе ја влоши веќе катастрофалната хуманитарна ситуација и дополнително ќе ги загрози животите на заложниците“.
Високата претставничка на ЕУ за надворешна политика, Каја Калас, утре ќе им презентира предлози на националните претставници за зголемување на притисокот врз Израел поради неговата воена кампања во Газа, објави агенцијата АП.
Минатата недела, претседателката на Европската комисија, Урсула фон дер Лаен, изјави дека ќе побара одобрение од земјите-членки на ЕУ за нови санкции против крајнодесничарските израелски екстремисти и делумно суспендирање на трговскиот договор со Израел.
Таа, исто така, изјави дека ќе ги замрзне милионите евра доделени на Израел од страна на извршното тело на ЕУ, за што нема да биде потребно одобрение од сите земји-членки.
