Земјите на ЕУ воведоа казнени мерки против Косово, земја со мнозинско албанско население, откако владата на премиерот Аљбин Курти не одговори на повиците на ЕУ и САД за смирување на немирите на северот со мнозинско српско население, по најжестокото насилство во повеќе од една деценија.
Мерките вклучуваа суспензија на посетите на косовски функционери во ЕУ и ускратување на голем дел од економската помош од Унијата. „Добри вести за Косово“, напиша Фон дер Лаен во објава на платформата Икс доцна во средата. „Планираме 216 милиони евра финансиска помош и имаме намера да ослободиме 205 милиони евра во почетокот на следната година“.
Насилството избувна на северот на Косово во 2023 година, откако етнички албански градоначалници ја презедоа функцијата по победата на локалните избори. Изборите беа бојкотирани од Србите, кои бараа спроведување на десет години стар договор со кој им се дава поголема автономија.
Околу 30 припадници на мировните сили на НАТО, кои ги обезбедуваа општинските згради, беа повредени во судирите со српските демонстранти, а повредени беа и 52 Срби. Фон дер Лаен изјави дека ЕУ одлучила да ги укине мерките откако српските градоначалници ја презеле функцијата по локалните избори одржани во октомври.
Косово треба да одржи нови парламентарни избори на 28 декември, поради неуспехот да се формира влада по изборите во февруари.
