По повеќе од 18 часа преговори, министрите за заштита на животната средина од земјите од Европската Унија дадоа неформална поддршка за компромисот за намалување на емисиите за 90% до 2040 година во споредба со нивото од 1990 година, со флексибилност за евентуално разводнување на оваа цел, потврдија дипломатите од ЕУ.
Министрите на ЕУ планираат повторно да се состанат утрово за формално да го одобрат договорот. Неколку земји, вклучувајќи ги Полска, Чешка и Унгарија, навестија дека ќе се спротивстават на планот, но не доволно за да го блокираат договорот бидејќи му е потребна поддршка од најмалку 15 земји-членки.
„Веруваме дека имаме основа за политички договор“, изјави портпаролот на Данска, која претседава со ЕУ и со овие разговори.
Олеснетата цел би им овозможила на земјите да купуваат странски јаглеродни кредити за да покријат до 5% од целта за намалување на емисиите од 90%, според нацрт-договорот на ЕУ што го видел Ројтерс. Во практиката, ова би значело дека европските компании би можеле да ги намалат емисиите за 85%, при што јаглеродните кредити во странски земји ќе плаќаат за намалување на емисиите во име на Европа за да го надоместат остатокот.
Во нацрт-договорот се наведува дека ЕУ дополнително ќе разгледа и намалување на целта за уште 5% преку јаглеродни кредити. ЕУ брза да се согласи за својата нова климатска цел за да не стигне на самитот за климата КОП30 со празни раце. Претседателката на Европската комисија, Урсула фон дер Лаен, ќе се сретне со други светски лидери на 6 ноември.
„Многу работи се во прашање. Ризикуваме да го изгубиме нашето меѓународно лидерство, што е клучно во овој извонредно сложен контекст“, изјави вчера шпанската министерка за животна средина, Сара Агесен, за новинарите.
Во понатамошен обид да ги освои скептичните земји, во нацрт-компромисот се вели дека ЕУ ќе ги омекне другите политички чувствителни климатски политики, вклучително и одложување на лансирањето на пазарот за загадување со јаглерод за една година, до 2028 година. Полска и Чешка се спротивставуваат на оваа политика, наведувајќи стравувања дека би можела да доведе до повисоки цени на горивата.
Некоу земји, вклучувајќи ги Франција и Португалија, побараа флексибилност од 5% во јаглеродни кредити, додека други, вклучувајќи ги Полска и Италија, побараа 10%. Шпанија и Холандија беа меѓу оние што се спротивставија на понатамошното намалување на целта, рекле дипломати од ЕУ за Ројтерс.
Европската комисија првично предложи цел за намалување на емисиите од 90%, со максимален удел на јаглеродни кредити до 3%. Ублажувањето на целта е реакција против амбициозната климатска агенда на Европа, која не е добро прифатена од индустријата и од некои влади, кои не веруваат дека можат да си дозволат да преземат мерки заедно со одбранбените и индустриските приоритети.
„Не сакаме да ја уништиме економијата. Не сакаме да ја уништиме климата. Сакаме да ги спасиме и двете истовремено“, изјави вчера заменик-министерот за клима на Полска, Кшиштоф Болеста. Полска, Италија, Чешка и други се спротивставија на првичната цел од 90% како премногу рестриктивна за домашната индустрија, која се бори со високи трошоци за енергија, поевтин кинески увоз и американски тарифи.
Други, вклучувајќи ги Холандија, Шпанија и Шведска, ги наведоа влошувањето на екстремните временски услови и потребата да се достигне Кина во производството на зелена технологија како причини за амбициозните цели. Независните советници на ЕУ за климатски науки предупредија дека купувањето странски кредити за КОП30 ќе ги одвлече мошне потребните инвестиции од европската индустрија.
