„Не треба да имаме илузии дека последиците од оваа криза за енергетските пазари ќе бидат краткотрајни, бидејќи нема“, изјави Јоргенсен на прес-конференција по виртуелниот состанок на министрите за енергетика на земјите-членки на Европската Унија.
Јоргенсен презентираше податоци според кои цената на гасот во ЕУ се зголемила за околу 70 проценти од почетокот на конфликтот на Блискиот Исток, а на нафтата за 60 проценти. Дополнителни 14 милијарди евра се потрошени за еден месец за увоз на фосилни горива во ЕУ.
Комесарот ги повика членовите на Унијата да одговорат на енергетската криза на координиран начин и дека мерките мора да бидат насочени и привремени. Тој исто така истакна дека ЕУ не смее да заборави на својата долгорочна цел, постигнување целосна независност од увезените фосилни горива.
„Оваа криза уште еднаш ни покажува дека Европа се соочува со фундаментална ранливост на надворешни енергетски шокови, што е поврзано со нашата зависност од увозот на фосилни горива“, кажа Јоргенсен. „Енергетската независност е патот напред и е стратегиски императив од економска и безбедносна гледна точка, не само поради климата“.
Во говор што потсетува на раните денови на пандемијата на коронавирусот, Јоргенсен кажа дека Европа се соочува со „многу сериозна ситуација“ без крај на повидок. „Дури и ако утре завладее мир, нема да има враќање во нормала во догледна иднина“, кажа тој.
„Колку повеќе нафта успеете да заштедите, особено дизел и авио гориво, толку на сите ќе ни биде подобро“, кажа Јоргенсен, потврдувајќи ги претходните медиумски извештаи дека Брисел сака Европејците да патуваат помалку.
Тој ги повика земјите-членки да го следат советот на Меѓународната агенција за енергија, кој, рече тој, вклучува работа од дома кога што е можно, намалување на ограничувањето на брзината на автопатите за десет километри на час, охрабрување на јавниот превоз, воведување систем за пар-непар за приватни автомобили, охрабрување на споделување на транспортот и усвојување поекономични навики на возење.
Долгорочно, тој ги повика земјите од ЕУ да ги удвојат напорите за изградба на нови обновливи извори на енергија. „Ова мора да биде моментот кога конечно ќе ја свртиме ситуацијата и ќе станеме навистина енергетски независни“, истакна тој.
Коментарите на Јоргенсен доаѓаат во време на растечки стравувања дека светот се соочува со голема енергетска криза што би можела да го надмине нафтениот шок од 1970-тите и да има глобални економски последици споредливи со пандемијата на коронавирусот.
Откако Соединетите Американски Држави и Израел го нападнаа Иран пред повеќе од еден месец, цените на нафтата и гасот се зголемија за дури 70 проценти, бидејќи една петтина од светските залихи на сурова нафта и течен природен гас се блокирани во Персискиот Залив.
Средбата на министрите на ЕУ заврши без конкретни предлози, но Јоргенсен вети дека Комисијата ќе објави пакет мерки на ниво на целата Унија во блиска иднина.
Според луѓе запознаени со дискусиите, тие разговарале за државни субвенции, зголемување на уделот на обновливи извори и нуклеарна енергија со цел зајакнување на енергетската безбедност и поддршка на предлогот на Комисијата за поттикнување на биогоривата. Нордиските земји ја нагласиле потребата од заштита на енергетската инфраструктура.
Очекувањата за конкретни потези пред состанокот беа мали, според изјавите на неколку дипломати кои сакале да останат анонимни. Целта, според нив, е да се координираат активностите.
