На прашањето за употребата на сила против демонстрантите и масовните апсења на учесниците во протестот во саботата, Мерсие кажа дека ЕУ очекува „брза, транспарентна и веродостојна истрага за наводите за прекумерна употреба на сила“, пренесуваат агенциите.
„Внимателно ја следиме ситуацијата. Го осудуваме секој чин на омраза и насилство. Правото на мирно собирање мора да биде заштитено. Полициските акции мора да бидат пропорционални и во согласност со основните права, вклучително и правата на сите уапсени“, кажа Мерсие.
Во исто време, рускиот министер за надворешни работи Сергеј Лавров вчера изјави дека Москва очекува ситуацијата во Србија да се реши во согласност со уставот и законите и изрази надеж дека западните земји „нема да се вклучат во уште една обоена револуција“.
На прес конференција по состанокот на Советот на министри за надворешни работи на Организацијата за колективна безбедност (ОДБК) во Киргистан, Лавров кажа дека Москва „ја забележува подготвеноста на српското раководство за дијалог со демонстрантите“, пренесе РИА Новости.
Полицијата се судри со антивладините демонстранти во Белград во саботата, кои бараат предвремени избори и крај на дванаесетгодишното владеење на претседателот Александар Вучиќ.
Демонстрантите бараат ослободување на десетици уапсени студенти и други лица обвинети за напад врз полицијата или обид за соборување на владата по митингот.
Студентите повикаа на продолжување на граѓанската непослушност и блокади на клучните патишта во Белград и други делови од Србија.
Портпаролот на Кремљ, Дмитриј Песков, исто така, изјави дека „и покрај фактот дека Србија е под невиден притисок, не може да се исклучи можноста за користење познати методи за предизвикување обоени револуции“.
„Не се сомневаме дека сегашното раководство на Србија брзо ќе воспостави ред и закон“, кажа Песков, а пренесе Ројтерс.
Претседателот Вучиќ им се заблагодари на своите „руски пријатели“ за „будното проценување“ на она што се случува во Србија.
„Ви благодарам на вашите руски пријатели што го забележаа ова, му благодарам на Сергеј што го разбра совршено и им благодарам на ретките коректни руски аналитичари кои забележаа едно нешто – дека Вучиќ ќе биде малку построг. Јас не сум како некои што избегаа од Србија, па ќе се борам за слободата на Србија и никогаш нема да ја оставам Србија на најлошото“, изјави Вучиќ за новинарите во Севиља, на маргините на конференцијата на Обединетите Нации за финансирање на развојот.
Тој додаде дека власта во Србија се освојува на избори тогаш кога надлежните органи ќе го побараат тоа, а не, како што рече, кога тоа ќе го побара банда хулигани.
