„Во Русија во моментов има речиси милион борци“, изјави Цахкна за Телеграф на маргините на состанок на ЕУ во Брисел.
„Русија и Путин веќе користат разни луѓе за напади врз нашите општества, но кога ќе настапи мир, можеме да очекуваме доаѓање на стотици илјади поранешни борци во Европа“, рече тој. „Тие сигурно не доаѓаат со намера чесно да заработуваат и да плаќаат даноци, туку со многу лоши планови. Веќе сега гледаме како руските тајни служби организираат разни напади низ Европа.“
Естонија стравува дека Путин ќе го искористи евентуалниот прекин на борбите во Украина за да ја пренасочи својата агресија кон Европа преку хибридно војување. Во изминатите шест месеци, естонските безбедносни служби истражуваат на кои начини Путин би можел да ги искористи поранешните војници за понатамошно зајакнување на таквата војна против НАТО.
Европа и Обединетото Кралство бележат остар пораст на саботажи поврзани со Русија од почетокот на инвазијата врз Украина во 2022 година. Во текот на 2024 година, посредници на Кремљ беа поврзани со подметнување пожар во складиште во источен Лондон, каде што била складирана опрема за сателитска комуникација наменета за Украина. Минатата година, антитерористичката полиција истражуваше можна руска вмешаност во наводно палење имот во сопственост на сер Кир Стармер. Слични, често неразјаснети инциденти беа забележани во последните години и низ континентална Европа.
„Тие се совршени за таква мисија“, рече Цахкна за поранешните борци. „Имаат многу мрачно минато, а и психички… знаете, убивале, силувале… Затоа ова е ненадејна и многу голема опасност за европската безбедност.“
Во дипломатска нота упатена до министрите за надворешни работи на ЕУ, во која Телеграф имал увид, Естонија предупредува дека во војната во Украина учествувале околу 1,5 милиони руски државјани, од кои приближно 640.000 сè уште се во активна служба.
„На боиштето гледаме поранешни затвореници, силувачи, сите тие проблематични типови, а Путин не ги сака назад во Русија“, предупреди Цахкна. „Ќе бидат вооружени. Ќе ги испратат во Европа… Ние како НАТО точно знаеме како да се бориме против руската војска, но ова е поопасно и мораме да дејствуваме веднаш, додека сè уште се на боиштето.“
Според податоците на естонските разузнавачи, директно од руските казнени колонии во специјални воени единици биле регрутирани до 180.000 осудени криминалци. „Многумина од повратниците веќе извршиле тешки кривични дела. Во првата половина од 2025 година, вкупниот број на таквите дела во Русија достигна 15-годишен максимум, а тој пораст веројатно е поврзан со масовното враќање на поранешните борци“, се наведува во документот.
Поради тоа, Цахкна побара од своите колеги од ЕУ да разгледаат целосна забрана за влез на поранешни руски борци во шенгенското подрачје, кое опфаќа 29 земји, како и ембарго на работни визи и дозволи за престој. Естонија месецов веќе воведе забрана за 261 поранешен борец.
Цахкна го повика и Обединетото Кралство да се приклучи во иницијативата. На прашањето дали Британија може да учествува, тој одговори: „Веќе сега одлично соработуваме кога станува збор за терористи и други непожелни лица што се обидуваат да влезат. Гледам многу можности за координација и со земјите надвор од Шенген.“
„Но мораме да дејствуваме веднаш. Не сме подготвени за мир, Европа не е подготвена за мир“, додаде тој.
Обединетото Кралство не е дел од шенгенското подрачје. Сепак, по брегзитот, владата на Стармер се обидува да обезбеди подобар пристап до базите на податоци на ЕУ за криминал и миграции. Теоретски, Британија би можела да добие пристап до кој било список на поранешни руски војници што ќе го состави ЕУ, за да спроведе сопствена забрана, истовремено споделувајќи свои разузнавачки податоци.
Портпаролот на британската влада изјави: „Безбедноста на границите е прашање на национална безбедност и имаме строги мерки за заштита на нашата земја од руската закана. Ќе продолжиме да соработуваме партнерски со нашите сојузници за целосно да ги искористиме нашите капацитети против оние што сакаат да ги загрозат нашите вредности, да им наштетат на нашите граѓани и да ја поткопаат нашата заедничка безбедност.“
