Стармер вчера пристигна во Турција за да го потпише договорот за продажба на тие воени авиони во вредност од неколку милијарди евра, кои Анкара сака да ги искористи за подобрување на своите борбени способности.
Пред средбата со Ердоган, Стармер кажа дека станува збор за „нарачка од осум милијарди фунти (9,2 милијарди евра)“ што, како што рече, значи работни места низ целата земја.
Ердоган, зборувајќи заедно со Стармер, го поздрави договорот, кој според него претставува „нов симбол“ во стратегиските односи меѓу Анкара и Лондон.
„Нашите земји можеби се на спротивните краеви на Европа, но ние сме силни партнери кои работат поблиску сега од кога било досега“, кажа Стармер за време на церемонијата на потпишување.
„Ова ќе ја зајакне безбедноста низ НАТО, ќе ја продлабочи нашата билатерална одбранбена соработка и ќе го поттикне економскиот раст тука и во Велика Британија со обезбедување 20.000 британски работни места“, кажа Стармер, додавајќи дека е горд што британските „тајфуни“ ќе бидат витален дел од турските воздухопловни сили во наредните години.
Британскиот министер за одбрана истакна дека ова е „најголемиот договор за борбени авиони во една генерација“ и прецизираше дека првите испораки треба да бидат во 2030 година.
Тој кажа за време на церемонијата на потпишување, оправдувајќи ја продажбата, дека Турција го брани „југоисточното крило на НАТО“.
Турскиот претседател, кој сака да ја модернизира воздухопловната флота на својата земја, сака да набави околу четириесет авиони од овој тип произведени од конзорциум од четири европски земји, Велика Британија, Германија, Италија и Шпанија, предводени од британската компанија БАЕ системс.
Турција и Велика Британија потпишаа прелиминарен договор за јурофајтерите во јули.
Договорот дојде откако Германија одлучи да го прекине своето долгогодишно противење на продажбата на авиони на Турција.
Турскиот министер за одбрана Јасар Ѓулер изјави дека Турција сака да набави 12 употребувани авиони од Катар и исто толку од Оман.
Турција, која првично сакаше американски ловци Ф-35, во последните години го префрли својот фокус на јурофајтер откако беше исклучена од американската програма поради купувањето на рускиот систем за воздушна одбрана С-400.
Турција, членка на западниот воен сојуз на НАТО, исто така бара повторно влегување во американската програма за ловци Ф-35.
