Документите, објавени во петокот, содржат и писма во кои Епстин постојано разговарал за можност за средба со Путин, иако средбата никогаш не се случила.
Епстин, кој, според официјалната верзија, изврши самоубиство во затвор во Њујорк во 2019 година додека чекаше судење за обвиненијата за трговија со луѓе за сексуална експлоатација, беше богат финансиер со врски во светот на политиката, бизнисот и славните личности.
Новите материјали вклучуваат повеќе од три милиони страници документи, 180.000 слики, 2.000 видеа и стотици лични писма и е-пошта на Епстин.
Американското Министерството за правда наведе дека објавувањето е дел од долгорочната истрага за неговите криминални активности. Рускиот медиум Агентура, поврзан со руските разузнавачки служби, истакнува дека името на Путин се спомнува во нив повеќе од 1.000 пати, а Русија речиси 5.900 пати.
Се чини дека Епстин барал можности да се сретне со Путин. Во мејл од октомври 2010 година до лице чија адреса е сокриена, тој прашал: „Дали Путин бил на твојот брод?“.
Подоцна истата година, кога аплицирал за руска виза, тој наводно напишал: „Дали треба да молам за виза? Имам пријател на Путин, дали треба него да го прашам?“. Во август 2011 година, тој му кажал на бизнисмен од Обединетите Арапски Емирати дека „Путин можеби доаѓа во САД. Подобро би сакал да го видам таму, така што во Сочи е малку веројатно“.
Епстин постојано му пишувал на Торбјорн Јагланд, тогашен генерален секретар на Советот на Европа и поранешен норвешки премиер, за можноста за средба со Путин. Така, во мај 2013 година, го информирал дека Бил Гејтс ќе биде во Париз и додал: „Путин е добредојден да ни се придружи на вечерата“.
Во јануари 2014 година, тој го замолил Јагланд да „му објасни на Путин дека на Русија ѝ е потребна понапредна верзија на биткоин“, а во јули 2015 година напишал дека „сè уште сака да се сретне со Путин и да разговара за економијата“. Во јуни 2018 година, тој напишал дека би „сакал“ да се сретне со Путин и понудил средба со рускиот министер за надворешни работи Сергеј Лавров, истакнувајќи дека претходно се сретнал со рускиот амбасадор во ОН, Виталиј Чуркин.
Во извештај на ФБИ од 27 ноември 2017 година, врз основа на изјава на доверлив извор, се шпекулира дека Епстин е „финансиски советник на Путин“ и дека му пружал слични услуги на претседателот на Зимбабве, Роберт Мугабе“.
Претходно објавените документи на Министерството за правда веќе ги истакнаа врските на Епстин со водечки директори, познати личности, академици и политичари, вклучувајќи го и американскиот претседател Доналд Трамп и поранешниот американски претседател Бил Клинтон.
Случајот продолжува да привлекува големо внимание од јавноста, особено меѓу поддржувачите на Трамп, поради постојаните обвинувања за мрежа за трговија со луѓе за сексуална експлоатација за светската елита.
