Џорџе Симион, поддржувач на Доналд Трамп што сонува да стане претседател на „МАГА“ (Да ја направиме Америка повторно голема), доби околу 40 отсто од гласовите откако беа изброени повеќе од 90 отсто од гласачките ливчиња.
Веднаш по него следуваат двајца проевропски кандидати, секој со околу 20 отсто од гласовите.
„Заедно направивме историја денес“, рече Симион во видеопораката емитувана во неговото партиско седиште пред неговите ентузијастички поддржувачи, кои извикуваа „Крадците надвор, патриотите внатре!“
Навестената победа би можела да се изгуби во вториот круг на 18 мај, комплицирана задача бидејќи Симеон има помал „резервоар на гласови“ на хартија од неговите ривали, изјави за АФП професорот по политички науки Сергиу Мискоиу, предвидувајќи тесна трка.
Но други експерти укажуваат на крахот на противниците на десничарските суверенисти по кампањата обележана со жестоки обвинувања и ниски удари дури и меѓу потенцијалните сојузници во вториот круг.
Вкупно 11 кандидати се натпреваруваа за главно церемонијалното, но во надворешната политика влијателно претседателство во оваа земја членка на ЕУ со 19 милиони жители, која стана клучен столб на НАТО поради руската инвазија на соседна Украина.
Ненадејната победа на првите претседателски избори во ноември на Калин Георгеску, поранешен висок функционер обвинет дека е про-Кремљ, ја зголеми загриженоста на Западот и ја втурна Романија во превирања.
Уставниот суд ги поништи тие избори и го исклучи 60-годишникот од повторно кандидирање по масовната кампања на Тикток поради сомневањата за руско мешање.
Него го замени Симион (38), кој есента беше дури четврти, а двајцата се појавија заедно во неделата на избирачкото место во Могосоа, во близина на Букурешт.
За време на кампањата, Симион ја нагласи својата младост, суверенистичката реторика и доминацијата на платформата Тикток за да ги привлече гласачите на Георгеску.
Додека овој лидер на партијата АУР негира каква било проруска наклонетост, тој ја дели истата аверзија кон „бриселските бирократи“ и се спротивставува на каква било воена поддршка за Киев.
Гласачите во текот на денот изразија желба за „промена“ и отфрлање на традиционалните политички партии што беа на власт од крајот на комунизмот во 1989 година.
Сите зборуваат и за инфлацијата, која е многу висока во Романија.
Неизвесноста пред вториот круг од изборите е голема бидејќи јазот е толку тесен меѓу кандидатот на проевропската владина коалиција, Крин Антонеску (65) и центристичкиот градоначалник на Букурешт, Никушор Дан (55), со антикорупциската платформа.
Зад нив, со помалку од 15 проценти од гласовите, е поранешниот социјалдемократски премиер Виктор Понта, и покрај неговиот говор со трамповски призвук.
Доколку Симион ја преземе највисоката функција во државата, тој ветува дека „ќе го донесе Калин Георгеску на власт“, наведувајќи три опции: „референдум, предвремени парламентарни избори или формирање на коалиција во Парламентот што би го назначила за премиер“.
По поништувањето на ноемвриските избори, ретка одлука во ЕУ, гласањето во неделата беше под голема лупа.
Илјадници луѓе демонстрираа во последните месеци, осудувајќи го поништувањето на изборите како „државен удар“. Соединетите Држави, исто така, интервенираа, при што потпретседателот Џеј-Ди Венс повика да се слушне гласот на народот, кој е замолчен „врз основа на слабите разузнавачки сомнежи“ за руско мешање.
Властите, кои ги засилија превентивните мерки, уверуваат дека „извлекле поуки“ од тоа фијаско.
Додека екстремната десница наведе „повеќе знаци на измама“, владата укажа на кампањите за дезинформација, сметајќи ги како „нови обиди за манипулација и мешање од државните актери“. Но овој пат не се споменуваше Русија.
