Видеоснимките прикажуваат силни експлозии и осветлено небо, кои започнале околу полноќ и траеле околу два часа во областа на Меѓународниот аеродром „Диори Хамани“, кој воедно е и клучен центар за војската на Нигер.
Асошиејтед прес јавува дека не можел независно да ги потврди видеоснимките, на кои наводно се гледаат и воени камиони, како и пожари.
#Breaking
A passenger flight from Algiers to Niamey has been diverted to #Burkina_Faso, amid heavy gunfire and explosions at the international airport of the Nigerien capital – @BrantPhilip_ #Niamey #Niger https://t.co/pVIh4RVRr3 pic.twitter.com/MYWFOnmKJp— ⚡️🌎 World News 🌐⚡️ (@ferozwala) January 29, 2026
Засега не е познато што довело до експлозиите и пукањето, ниту дали има загинати или причинета материјална штета.
Утрово ситуацијата, според сè, се смирила, пренесува Асошиејтед прес.
Меѓународниот аеродром во Ниамеј има и воена база, а таму се чува и пратка ураниум од рудниците во Нигер, наменета за извоз.
Агенцијата Анадолу пренесе изјава од претставник на Министерството за надворешни работи дека ситуацијата сега е под контрола.
„Ситуацијата е под контрола. Нема причина за загриженост“, соопшти агенцијата. Претставникот изјавил дека се обидуваат да утврдат дали пукањето е поврзано со пратката ураниум.
Нигер го води Абдурахман Тијани, кој ја презеде власта во 2023 година со државен удар, кога беше соборен избраниот цивилен претседател.
Како и неговите западноафрикански соседи Буркина Фасо и Мали, земјата се соочува со џихадистички групи што спроведуваат смртоносни напади низ регионот.
Земјата е и еден од водечките производители на ураниум.
Голема пратка ураниум наменета за извоз се наоѓа на аеродромот, поради нерешени правни и дипломатски компликации со Франција, откако воената влада ги национализираше рудниците за ураниум во земјата.
