Во Германија во моментов живеат повеќе од 950.000 луѓе со сириско потекло, а според податоците од Федералната служба за вработување околу 320.000 од тој број се вработени.
Институтот за германска економија (ИВ) од Келн објави дека во август 2025 година во Германија имало 260.000 постојано вработени Сиријци, со тренд на зголемување, а околу 80.000 од нив на работни места што компаниите многу тешко ги пополнуваат.
Според податоците на ИВ, повеќето Сиријци работат во секторот за моторни возила, транспорт и логистика, угостителство и здравствена заштита. Од вкупниот број вработени, приближно половина се квалификувани работници, а околу десет проценти се специјалисти и експерти.
Покрај тоа, 21.000 млади Сиријци студираат во Германија, а 7.000 се чираци, а тоа е делумно и во дефицитарни професии како што се стоматолози, грејачи и санитарни техничари или градежни електричари.
ИВ истакнува дека истражувањето не ги зело предвид околу 250.000 граѓани на Сирија кои добиле германско државјанство од 2015 до 2024 година, бидејќи тие на пазарот на трудот се водат како Германци.
Како важен фактор економистите на ИВ ја истакнуваат просечната возраст на Сиријците, која е околу 27 години, а приближно една третина, 328.400 луѓе, се малолетници. „Во контекст на демографските промени и очекуваното намалување на бројот на работоспособно население, оваа група е значаен резервоар за пазарот на трудот“, наведува ИВ.
Институтот потсетува дека во 2024 година, само 54.900 луѓе дошле во Германија врз основа на редовни работни дозволи од трети земји, „што не е ни приближно доволно за да се компензира пензионирањето на генерацијата бејби-бумери“, односно луѓе родени помеѓу 1946 и 1964 година.
„Само во овој законодавен период, 5,1 милиони луѓе ќе се пензионираат од таа генерација, а само два милиони луѓе ќе го заземат нивното место“, истакна ИВ, предупредувајќи дека барањето за паушално враќање на Сиријците „ја игнорира сложеноста на интеграцијата на Сиријците“ и ја крие опасноста дека квалификувани и добро интегрирани луѓе ќе ја напуштат Германија.
И Германскиот институт за економски истражувања (ДИВ) од Берлин, во одвоено соопштение, предупреди дека заминувањето на работниците од Сирија дополнително ќе го зголеми проблемот со недостигот на работна сила во сектори како што се транспортот, логистиката, одредени производствени активности и здравството.
ДИВ предупреди дека поради демографските промени и стареењето на германското население, „последиците одат подалеку од поединечните сектори“ и би можеле да го забават потенцијалот за раст на целата економија и да го запрат економското закрепнување.
„Затоа дополнителната имиграција и долгорочното задржување на веќе имигрираната работна сила е централен фактор во амортизацијата на демографските промени“, соопшти ДИВ.
Денес, Здружението на германски градови изрази очекување дека владата во Берлин ќе преземе чекори за да можат квалификуваните работници од Сирија да останат во Германија, без оглед на проценката на властите дека ситуацијата во нивната татковина се нормализирала.
Мерц ја даде изјавата за репатријација на 80 проценти од Сиријците во следните три години на 30 март на прес-конференција по состанокот со привремениот претседател на Сирија Ахмед Ал Шара.
По бројните критики дека неговиот план е политички нереален или економски штетен, Мерц синоќа изјави дека целта за репатријација на 80 проценти од Сиријците ја презентирал сирискиот претседател на состанокот.
Изјавата предизвика несогласувања во владејачката коалиција на христијанските демократи на Мерц и социјалдемократската СПД.
