Екипажот на Артемис 2, кој лета во својата капсула Орион откако полета од Флорида минатата недела, денеска треба да се разбуди околу 16:50 часот за својот шести ден од летот. До 1:05 часот по полноќ (вторник) ќе го достигнат максималното растојание на мисијата од Земјата од приближно 406.800 километри, што е околу 6.600 километри повеќе од рекордот што екипажот на Аполо 13 го држеше цели 56 години.
Додека астронаутите на НАСА Рид Вајзман, Виктор Гловер и Кристина Кох и канадскиот астронаут Џереми Хансен се приближуваат до рекордното растојание, тие ќе кружат околу далечната страна на Месечината, набљудувајќи ја од приближно 6.400 километри над нејзината затемнета површина, додека таа ја помрачува Земјата, која е со големина на кошаркарска топка во далечната заднина, вели Ројтерс.
Овој момент е кулминација на речиси десетдневната мисија Артемис 2, првиот пробен лет со екипаж на програмата Артемис на НАСА. Оваа серија мисии, кои чинат повеќе милијарди, има цел да ги врати астронаутите на површината на Месечината до 2028 година пред Кина и да воспостави долгорочно американско присуство таму во следната деценија, градејќи база на Месечината што би служела како подготовка за можни идни мисии кон Марс.
Официјално започнувајќи во 20:34 часот, прелетот околу Месечината ќе го воведе екипажот во мрак и кратки прекини во комуникацијата додека Месечината ги блокира од мрежата Дип спејс нетворк на НАСА, глобален систем од масивни радиоантени што агенцијата го користи за комуникација со екипажот.
Прелетот ќе трае околу шест часа, за време на кои астронаутите ќе користат професионални камери за да направат детални фотографии низ прозорецот на Орион од силуетата на Месечината, прикажувајќи ретка и научно вредна перспектива на сончевата светлина што се филтрира околу нејзините рабови во она што практично ќе биде затемнување на Месечината.
Тие исто така ќе имаат можност да фотографираат еден редок момент во кој нивната матична планета, намалена поради нивното рекордно растојание во вселената, ќе се издигне од хоризонтот на Месечината додека нивната капсула излегува од другата страна, небесна варијација на изгрејсонце на Месечината гледано од Земјата.
Тим од десетици научници за Месечината, распоредени во просторијата за научна евалуација во вселенскиот центар Џонсон на НАСА во Хјустон, ќе водат белешки додека астронаутите, кои изучувале низа појави на Месечината како дел од подготовката за мисијата, ја опишуваат својата глетка во реално време.
