„Ја сметаме Европа за наш сојузник. Ние едноставно сакаме сојуз во кој Европејците ќе бидат малку понезависни, а тоа ќе се одрази на нашите безбедносни и трговски односи“, рече Венс, кој постојано ги напаѓа европските лидери. „Не е добро за Европа и не е американски интерес, Европа да биде постојан вазал на САД во однос на безбедноста“, посочи тој.
Откако се врати во Белата куќа, Доналд Трамп ги повика Европејците да трошат повеќе за сопствената одбрана и остро ја критикуваше Европската Унија, обвинувајќи ја дека води нефер трговска политика кон САД. Венс, исто така, постојано ги критикуваше европските лидери, велејќи во говорот во Минхен во февруари дека тие не се борат доволно цврсто против имиграцијата и дека слободата на говор е под закана во Европа.
„Реалноста е – брутално е да се каже, но вистина е – дека целата европска безбедносна инфраструктура е субвенционирана од САД откако сум роден“, Џеј Ди Венс ја осуди Европа во интервју за британска веб-страница за вести. Тој додаде дека со исклучок на Франција, Велика Британија и Полска, повеќето европски земји немаат армии способни да гарантираат разумна одбрана.
На почетокот на март, тој ги шокираше Европејците со изјавата дека за Украина, склучувањето економски договор со САД ќе биде подобра гаранција за безбедноста од 20.000 војници од земја која не војувала 30 или 40 години.
„Мислам дека понезависна Европа не е лоша за САД“, нагласи тој, велејќи дека верува оти посилна Европа можела да ја избегне стратешката катастрофа од војната што ја започна во Ирак коалицијата предводена од САД во 2003 година во минатото.
Осврнувајќи се на преговорите меѓу Лондон и Вашингтон за склучување билатерален економски договор, Венс рече дека имаат добри шанси да резултираат со одличен договор кој ќе биде во најдобар интерес на двете земји.
