Сатиш Катик и Саџид Мохамед налетале на голем, светкав камен на парцела што ја изнајмиле само неколку недели претходно, пишува Би-би-си.
Кога каменот го однеле кај официјален проценител, дознале дека пронашле дијамант од 15,34 карати, со врвен квалитет – еден од најквалитетните природни дијаманти што постојат.
„Проценката на пазарната цена на каменот е околу пет до шест милиони рупии (55.000 – 66.000 долари) и наскоро ќе биде понуден на аукција“, рекол Анупам Синг, проценител на дијаманти, за Би-би-си Хинди.
Владата организира квартални аукции, привлекувајќи купувачи од цела Индија, но и од странство, кои лицитираат за дијамантите.
„Проценките на цените зависат од курсот на доларот и референтните вредности од извештајот на Рапапорт“, рече Синг. Рапапорт нашироко се смета за водечки авторитет за независна анализа на пазарот на дијаманти и накит.
Катик и Мохамед велат дека се пресреќни.
„Сега можеме да ги обезбедиме браковите за нашите сестри“, изјавија тие.
Катик (24), кој води месарница, и Мохамед (23), кој продава овошје, потекнуваат од сиромашни семејства и се најмлади синови.
Со генерации нивните семејства си ја пробувале среќата во потрагата по дијаманти, што во овој округ е вообичаена практика меѓу жителите.
Пана, која се наоѓа во сојузната држава Мадја Прадеш, е еден од најмалку развиените окрузи во Индија – жителите се соочуваат со сиромаштија, недостиг од вода и невработеност.
Сепак, Пана е дом на поголем дел од индиските резерви на дијаманти и останува омилена дестинација за ловците на дијаманти.
Индиските резерви на дијаманти се релативно ограничени во споредба со главните светски производители, но имаат големо историско значење.
Мохамед вели дека неговиот татко и дедо со децении копале по тие парцели, но не пронашле ништо освен „прашина и парчиња кварц“.
Парцелата била изнајмена во потрага по дијаманти делумно од очај, бидејќи нивните мали приходи не можеле да ги покријат растечките трошоци за домаќинството – а камоли да платат свадба, рекол Мохамед за Би-би-си.
Барањето дијаманти не е лесна работа, но двајцата пријатели по работното време навечер, или кога и да имале слободно време, просејувале купишта земја и камења.
Како и повеќето локални жители, дијамантите ги барале рачно – копале дупки, ја ваделе земјата и камењата, ги миеле низ сита и внимателно просејувале илјадници мали камчиња кога ќе се исушеле.
Рави Пател, раководител на рударскиот оддел на округот Пана, изјави дека пријателите имале неверојатна среќа.
„Парцела е изнајмена на 19 ноември. Имаа среќа што за само неколку недели пронајдоа дијамант со врвен квалитет“, изјави тој.
