Воените офицери објавија дека го суспендираат изборниот процес во Гвинеја-Бисао и ги затвораат нејзините граници, во соопштение прочитано во штабот на армијата во главниот град Бисао и емитувано на државната телевизија. Тие рекоа дека формирале „висока воена команда за враќање на редот“, која ќе владее со земјата.
Претходно во текот на денот се слушнаа истрели во близина на седиштето на изборната комисија, претседателската палата и Министерството за внатрешни работи, иако не беше јасно кој е одговорен. Военото преземање на власта е најновото во серијата државни удари и обиди за државни удари во Гвинеја-Бисао откако таа доби независност од Португалија во 1974 година.
Guinea Bissau 🇬🇼: full statement of Bregadier general Denis N’Canha in which he announces the military has taken full control of the country. pic.twitter.com/uUJtxXXocw
— Thomas van Linge (@ThomasVLinge) November 26, 2025
Според Светската банка, просечниот годишен приход во Гвинеја-Бисао минатата година изнесувал само 963 долари по жител.
ОН во 2008 година ја прогласи Гвинеја-Бисао за „наркодржава“ поради нејзината улога како центар за глобалната трговија со кокаин. Сместена помеѓу Сенегал и Гвинеја, нејзиниот брег е прошаран со многу речни делти и 88 острови на архипелагот Бихагос, за кои експертите велат дека обезбедуваат природни, дискретни места за слетување, кои ги користат колумбиските наркокартели.
Актуелниот претседател Умаро Сисоко Ембало се бореше да стане првиот претседател што ќе освои втор мандат за три децении. И тој и неговиот главен ривал, Фернандо Дијас, прогласија победа во првиот круг од изборите во неделата.
Денеска портпаролот на Ембало тврдеше дека пукале вооружени лица поврзани со Дијас. Сојузникот на Дијас го обвини Ембало дека се обидува да симулира обид за државен удар за да може да прогласи вонредна состојба и да ја задржи власта. Ниту еден од нив не даде докази за своите тврдења.
Изборната комисија требаше утре да ги објави прелиминарните резултати од претседателските и парламентарните избори. Според Ројтерс, Гвинеја-Бисао доживеала најмалку девет државни удари помеѓу независноста и доаѓањето на Ембало на власт во 2020 година. Ембало тврди дека преживеал три обиди за државен удар за време на неговиот прв мандат, од кои последниот наводно бил во октомври.
Сепак, критичарите тврдат дека Ембало ги измислил обидите за државен удар, користејќи ги како изговор за потиснување на опозицијата. Во декември 2023 година во Бисао со часови се слушаа истрели, што Ембало го нарече обид за државен удар. Тој го распушти парламентот и Гвинеја-Бисао оттогаш нема функционално законодавно тело.
