Сојузот на германската индустрија (БДИ) смета дека националната економија е во „слободен пад“. Индустрискиот сектор се соочува со драматична ситуација на крајот од 2025 година, изјави претседателот на БДИ Петер Лајбингер за агенцијата ДПА. „Економски, Германија е во најдлабоката криза од основањето на Сојузната Република, но федералната влада не реагира доволно решително“, ја критикува Лајбингер коалицијата на партиите ЦДУ/ЦСУ и СПД.
Во тековниот извештај на БДИ се предвидува (нов) пад на индустриското производство од два проценти оваа година. Ова би значело дека обемот на индустриското производство се намалува четврта година по ред. „Ова не е цикличен пад, туку структурен пад“, вели Лајбингер. Германската индустрија постојано губи, додава тој.
Германската економија е „во слободен пад“, предупредува шефот на моќното здружение на индустријалци. Сепак, БДИ е малку пооптимистичен во однос на Европската Унија. Според нивната анализа, индустриската рецесија во ЕУ веројатно е веќе завршена. БДИ ја ревидираше својата претходна прогноза кон подобро и сега очекува индустриското производство да се зголеми за еден процент оваа година. Претходната прогноза беше за пад од еден процент. И уште една добра вест: БДИ не очекува дека падот на германскиот извоз ќе продолжи во 2025 година.
Извештајот на БДИ се занимава со различни индустрии, а меѓу другото, се фокусира на хемиската индустрија. Неодамна, искористеноста на капацитетите на хемиските фабрики во земјата била само 70 проценти. Машинското инженерство и челичната индустрија се исто така под притисок. Сепак, ситуацијата во градежната индустрија се чини дека се стабилизира.
Се очекува зголемување на производството во автомобилската индустрија, а искористеноста на капацитетите во меѓувреме се зголемила. Сепак, се тврди дека вработеноста во автомобилската индустрија е сè уште во негативен тренд. Економските експерти предупредуваат на можноста за намалување на бројот на работни места во клучна гранка на националната економија. „На Германија сега ѝ е потребна фундаментална промена во економската политика со јасни приоритети во однос на конкурентноста и економскиот раст“, вели Лајбингер. Секој месец без одлучувачки структурни реформи ќе ја чини Германија дополнителни работни места и просперитет и сериозно ќе го ограничи просторот за маневрирање на земјата во иднина, предупредува шефот на БДИ.
Поточно, Лајбингер бара федералната влада да даде приоритет на инвестициите, а не на трошењето. Посебниот фонд (од кој треба да се инвестираат стотици милијарди евра во реконструкција на инфраструктурата и зајакнување на економијата итн.) мора да се користи транспарентно за дополнителни инвестиции, вели БДИ.
Критичарите се жалат дека федералната влада едноставно префрла проекти од државниот буџет во тој посебен фонд за инфраструктура и заштита на климата, со цел потоа да ги искористи ослободените средства од буџетот за финансирање на разни проекти на социјалната држава, како што е таканаречената „пензија за мајки“.
Тоа е мерка која беше усвоена на инсистирање на баварската ЦСУ. Нејзината цел е да се зголемат пензиските приходи за мајките (и татковците), така што времето што го поминале дома (а не на работното место) грижејќи се за децата ќе биде вклучено во износот на нивната пензија.
