Пораката доаѓа само еден ден откако границата меѓу Полска и Белорусија беше повторно отворена по речиси две недели блокада. Премиерот Доналд Туск предупреди дека преминот би можел повторно да биде затворен доколку безбедносната ситуација дополнително се искомплицира.
Кризата започна на почетокот на септември кога белорускиот КГБ го уапси полскиот католички монах, 27-годишниот Гжегож Гавел од Краков, обвинувајќи го за шпионажа во врска со заедничките руско-белоруски воени вежби Запад-2025.
Белоруската пропаганда тврди дека тој имал „таен воен документ“, додека полската влада ги отфрла обвинувањата како апсурдни провокации. Премиерот Туск најави контрамерки против режимот на Александар Лукашенко.
Белоруските организации за човекови права го прогласија монахот за политички затвореник, а кармелитскиот ред на кој му припаѓа апелираше до верниците да се молат за негова слобода.
Воени вежби Запад-2025 и зголемување на провокациите
Заедничките воени вежби меѓу Русија и Белорусија одржани во средината на септември дополнително ги зголемија тензиите. Официјално, учествуваа околу 13.000 војници, но западните извори проценуваат дека бројот можел да достигне 30.000. Поради ова, Полска ја затвори границата на 12 септември, а повторно ја отвори дури на 25 септември, со предупредување дека ќе реагира на секоја нова провокација.
Денот по отворањето на границата, белорускиот претседател Александар Лукашенко итно отпатува во Москва на средба со Владимир Путин. Во таа прилика тој нагласи дека „има низа регионални прашања“ за кои мора да донесе одлуки со Русија до крајот на годинава.
Полската амбасада посебно ги предупредува своите граѓани дека, доколку границата повторно се затвори, мора да користат премини преку Литванија и Латвија или летови од Минск. На граѓаните им се препорачува да имаат подготвени документи и доволно средства за патувањето, бидејќи околностите можат брзо да се променат.
