Кога руска манекенка му испратила електронска порака на Џефри Епстин во 2017 година, велејќи дека ѝ е драго што го видела, тој ѝ побарал „да испрати непристојна фотографија за да го докаже тоа“.
Потоа побарал да му испрати топлес фотографија, а кога таа одбила, велејќи дека се чувствува непријатно, тој го надополнил барањето со едно „те молам“. Но тонот нагло се сменил во друга порака, пет минути подоцна, кога објаснил дека „мојот руски пријател амбасадор за кој ти зборував штотуку почина во Њујорк“.
Се работело за Виталиј Чуркин, рускиот амбасадор во Обединетите нации и клучен соработник на претседателот Путин. Чуркин станал близок со Епстин и двајцата редовно одржувале утрински кафе-средби.
Размената на пораки нагласува како досиејата за Епстин не ја осветлуваат само постојаната предаторска потрага на милионерот-финансиер по жени, туку и неговата мрежа од пријатели и контакти со врски до Кремљ. Тоа го отвори прашањето дали можеби водел операција за „компромат“ – собирање компромитирачки материјал за истакнати личности.
Чуркин бил меѓу олигарсите, руските политичари и разузнавачки фигури со кои се среќавал Епстин. Името на Путин се спомнува повеќе од 1.000 пати во досиејата за Епстин.
Архивата од документи, објавена од американското Министерство за правда, покажува како Епстин го сметал Сергеј Бељаков, заменик-министер за економски развој и дипломец на академијата на разузнавачката служба ФСБ, за „многу добар пријател“.
По нивната прва средба во мај 2014 година, Бељаков му напишал на Епстин: „Нашата средба ми беше навистина многу интересна! Не познавам многу луѓе како тебе, кои можат да отворат нови хоризонти и перспективи.“
Во 2018 година, Бељаков ѝ напишал на руската генерална конзуларна служба во Њујорк, барајќи Епстин да добие тригодишна виза со повеќекратен влез. Навел дека Епстин води проекти за американски инвестиции во Русија и дека првата посета на Москва ќе биде проследена со многу други патувања за семинари и форуми. Трошоците на Епстин требало да ги покрие руска организација. Се чини дека Бељаков дал и препорака за посебна апликација за виза за еден од соработниците на Епстин.
Епстин му се обратил на Бељаков за помош и три години претходно, пишувајќи му во електронска порака дека „една руска девојка од Москва… се обидува да уценува група моќни бизнисмени во Њујорк. Тоа е лошо за бизнисот за сите вклучени“.
Во последователна порака од јули 2015 година, која Епстин си ја испратил самиот на себе, се чини дека го осмислувал својот одговор до манекенката, откако наводно разговарал со Бељаков. Во неа ја опишал својата лутина поради заканите и навел дека контактирал пријатели во ФСБ, кои „јасно ми објаснија“ дека обидите за уцена ќе бидат „третирани исклучително сурово… па очекувам никогаш повеќе да не слушнам закана од тебе“.
Бељаков го водел Меѓународниот економски форум во Санкт Петербург и го поканил Епстин да учествува. Кога беа воведени санкции против Русија по анексијата на Крим, форумот привлече помалку учесници, а Епстин понудил да помогне во пронаоѓање гости.
Кога претседателот Трамп беше избран во ноември 2016 година, Бељаков му испратил порака на Епстин со наслов „Честитки за вашиот претседател“. Епстин одговорил: „Забавно“.
Чуркин, кој ненадејно почина во својата канцеларија во Њујорк, служеше како амбасадор во ОН од 2006 година и се чини дека бил запознаен со Епстин во 2015 година. Според некои текстуални пораки, Епстин му помагал на синот на Чуркин да најде работа во САД, иако Американецот навел дека неговата вмешаност „мора да остане доверлива“. Еден коментар во дневник укажува на ручек во август 2016 година со Чуркин и Ехуд Барак, поранешен премиер на Израел.
Во електронска преписка од 2018 година, една година по смртта на Чуркин, Епстин се фалел дека му помогнал на Чуркин да го разбере Трамп. „Чуркин беше одличен. Тој го разбра Трамп по нашите разговори. Не е сложено. Мора да се види дека добива нешто – толку е едноставно“, напишал тој. Исто така тврдел дека Сергеј Лавров, рускиот министер за надворешни работи, би можел „да научи каков пристап треба да има при разговор со мене“.
Досиејата исто така сугерираат дека Епстин бил во контакт со Олег Дерипаска. Во декември 2009 година, Епстин наводно му напишал на лорд Манделсон, лабуристички министер за бизнис, прашувајќи дали „Олег“ познава некој ерменски бизнисмен што доаѓал да го посети. Манделсон одговорил, очигледно пренесувајќи совет од Дерипаска: „Немој да имаш ништо со тој тип.“
Дерипаска го стекна своето богатство во металната и енергетската индустрија и беше санкциониран во 2022 година поради неговата наводна блиска поврзаност со Путин. Тој беше во центарот на скандалот „Јахтгејт“ во 2008 година. Манделсон, тогашен комесар за трговија на Европската Унија, и Џорџ Озборн, тогашен канцелар во сенка, беа вмешани во контроверзија поради присуство на забава на неговата јахта.
Кога на Епстин итно му требала виза за Москва во 2010 година, бил направен неуспешен обид да се искористат локалните контакти на Дерипаска.
Во вторникот, Доналд Туск, полскиот премиер, објави истрага за тоа дали Епстин шпионирал за Русија. Тој бил осомничен дека регрутирал ескорт-девојки од Русија и други земји од источниот блок за собирање компромитирачки материјал. Туск изјави дека е веројатно „невидениот педофилски скандал да бил коорганизиран од руските разузнавачки служби“.
Во досиејата за Епстин има 1.056 спомнувања на Путин и речиси 10.000 референци за Москва, вклучително и предлози за потенцијални средби со Путин. Нема докази дека тие навистина се сретнале, вели Тајмс.
Во еден од нив, во мај 2013 година, Епстин побарал средба со Путин за да се обиде да го убеди „да преземе водство во финансиите“ и да го прескокне Западот на ист начин како што тоа било направено со Спутник, првиот вештачки сателит на Земјата.
Барајќи од некој свој контакт да му обезбеди средба, Епстин напишал дека „Русија е уникатна во својата способност да реализира голема визија“.
Епстин напишал: „Кога беше објавен Спутник, Западот беше фатен неподготвен. Истото може да се случи сега ако Русија го преземе водството во финансиите. Наместо да се натпреварува со Западот во нанотехнологија, да ја копира Силиконската долина, да бара стартапи, да се трка со Мајкрософт, Епл, Гугл и сличните, Русија може да излезе напред и да ја прескокне глобалната заедница преку реинвенција на финансискиот систем на 21 век.“
Кремљ ги негираше сугестиите дека е можно Епстин да бил платен од Москва. „Теоријата дека Епстин бил контролиран од руските разузнавачки служби може да се толкува на кој било начин, но не и сериозно“, изјави Дмитриј Песков, портпаролот на Путин.
