Според црногорското Министерство за европски прашања целта на кампањата е да се пренесе пораката до меѓународната јавност дека Црна Гора ќе стане 28-ма членка на Европската Унија до 2028 година.
Брендирањето на авионот е дел од поширока кампања која ќе се спроведе со цел да се запознае домашната и европската јавност со резултатите на Црна Гора во процесот на европска интеграција и амбицијата за полноправно членство до 2028 година.
„Ја носиме Европа во Црна Гора и ја носиме Црна Гора во Европа. Низ целата Европска Унија, нашата национална авиокомпанија ја носи пораката – Црна Гора е следната членка на Европската Унија“, изјави премиерот Милојко Спајиќ по повод презентацијата на авионот на аеродромот во Подгорица.
Crna Gora je istorijski i kulturno povezana sa EU, a punopravno članstvo dodatno će potvrditi našu posvećenost vrjednosnom sistemu koji podrazumijeva prava i obaveze, napredak, odgovornost i rezultate.
Uz pomoć naše državne avio-kompanije Air Montenegro, cijeloj Evropi šaljemo… pic.twitter.com/vAVJPmqmIm
— Milojko Spajić (@MickeySpajic) February 25, 2026
Спајиќ вели дека пораката во авионот на националната авиокомпанија претставува „стратегиска изјава на државата“, посочувајќи дека Црна Гора ѝ нуди на Европа стабилност, нова енергија и потврда за можноста за единство во различноста.
Црногорската министерка за европски прашања Маида Горчевиќ оцени дека членството во Европската Унија е амбициозна, но остварлива цел, велејќи дека институциите ја презеле одговорноста за спроведување на потребните реформи.
„Време е сите институции, економијата, спортистите, научниците, уметниците, студентите, медиумите, граѓанскиот сектор, локалните заедници и дијаспората да ја пренесат истата порака низ Европската Унија – 28 до 2028 година“, кажа министерката Горчевиќ.
Властите претходно објавија дека нивната цел е да ги затворат сите поглавја од преговорите до крајот на годината и со тоа да отворат простор за завршување на процесот на пристапување до 2028 година.
