Ограничувањето на имиграцијата беше клучен фактор на референдумот во Велика Британија во 2016 година за напуштање на Европската унија, но вкупниот број на пристигнувања се зголеми четирикратно откако земјата го напушти блокот, што помогна да се зголеми популарноста на Реформ УК, десничарската, антиимиграциска партија на Најџел Фараж.
Стармер рече дека нациите зависат од правилата што ги утврдуваат правата, одговорностите и обврските, и дека без нив Велика Британија ризикува „да стане остров на странци“.
Тој рече дека неговиот нов план значи дека миграцијата ќе падне нагло до крајот на овој состав на парламентот во 2029 година, но не даде нумерички цели.
„Тоа е ветување, но сакам да бидам многу јасен во врска со ова: ако се потребни понатамошни чекори, ако треба да направиме повеќе за да го намалиме притисокот врз пазарот на недвижности и нашите јавни услуги, тогаш запомнете ги моите зборови, ние ќе го сториме тоа“, рече тој на прес-конференција во својата канцеларија на Даунинг стрит.
Меѓу мерките објавени денес е намалување на бројот на работни дозволи за високообразовани лица за да се спречат компаниите во секторот за грижа и нега да вработуваат странски работници и да се охрабрат да ја интензивираат обуката на домашната работна сила.
Автоматското доделување државјанство за луѓето што се преселуваат во Велика Британија ќе се применува по 10 години, во споредба со досегашните пет, но процесот ќе биде забрзан за високообразовните како што се медицински сестри, лекари, инженери и експерти за вештачка интелигенција.
Владата исто така изјави дека има намера да воведе обврска за основно познавање на англискиот јазик за сите возрасни членови на семејството носители на виза. Исто така се вели дека тоа ќе помогне во интеграцијата и ќе го намали ризикот од злоупотреба.
Миграцијата долго време е жешко политичко прашање во Велика Британија, а критичарите тврдат дека социјалната кохезија би можела да биде поткопана ако владата не обезбеди доволно станови или јавни услуги за сè поголемиот број на жители.
Но, многу деловни сектори тврдат дека не можат да вработат доволно домашна работна сила, а претприемачите во научните и технолошките области предупредуваат дека строгите ограничувања ќе им наштетат на нивниот потенцијал и ќе го намалат целокупниот економски раст.
