Оваа одлука претставува значаен прекин во соработката со најблискиот сојузник и партнер и го истакнува растечкиот скептицизам во врска со легалноста на американската воена кампања во Јужна Америка, пишува Си-ен-ен.
Со години Обединетото Кралство, кое контролира голем број територии во Карибите каде што има разузнавачки ресурси, им помагало на САД да лоцираат сомнителни бродови за да може американската крајбрежна стража да ги пресретне.
Ова вклучувало запирање на бродовите, качување по нив, задржување на екипажот и запленување на дрогата. Разузнавачките информации обично се испраќаат до Заедничката меѓуагенциска работна група Југ, сместена на Флорида, која работи на борбата против нелегалната трговија со дрога.
Промена на американската стратегија
Меѓутоа, откако САД почнаа да ги вршат смртоносните напади врз бродови во септември, Велика Британија се загрижила дека разузнавачките информации што ги дава би можеле да се користат за изборот на цели. Британските претставници веруваат дека американските воени напади, во кои загинаа 76 лица, го кршат меѓународното право, велат изворите. Прекинот во размената на разузнавачки информации почнал пред повеќе од еден месец.
Yesterday, at the direction of President Trump, two lethal kinetic strikes were conducted on two vessels operated by Designated Terrorist Organizations.
These vessels were known by our intelligence to be associated with illicit narcotics smuggling, were carrying narcotics, and… pic.twitter.com/ocUoGzwwDO
— Secretary of War Pete Hegseth (@SecWar) November 10, 2025
Високиот комесар на Обединетите нации за човекови права Фолкер Турк минатиот месец изјави дека нападите го прекршуваат меѓународното право и претставуваат „вонсудско убивање“. Извори потврдиле за Си-ен-ен дека Обединетото Кралство се согласува со таа проценка.
Британската амбасада во Вашингтон и Белата куќа не одговориле на барањата за коментар, додека официјален претставник на Пентагон изјавил за Си-ен-ен дека одделот „не коментира разузнавачки прашања“.
Правно оправдување на САД
Пред американската војска во септември да почне со уништувањето на бродовите, агенциите за спроведување на законот и крајбрежната стража беа вклучени во борбата против нелегалната трговија со дрога. Членовите на картелите и шверцерите беа третирани како криминалци со право на правична постапка – нешто што Велика Британија со задоволство го помагала.
Но, администрацијата на американскиот претседател Доналд Трамп тврди дека американската војска може легално да ги убива осомничените трговци со дрога затоа што тие претставуваат непосредна закана за Американците и се „непријателски борци“ во „вооружен конфликт“ со САД, според меморандум испратен до Конгресот.
Овој аргумент е зајакнат со мислењето од Канцеларијата на правниот советник на министерството за правда, кое сè уште е тајно, а Трамп етикетираше голем број нарко-картели како „странски терористички групи“. Белата куќа постојано наведува дека постапките на администрацијата се „целосно во согласност со Законот за вооружени конфликти“.
Внатрешни несогласувања и критики
Сепак, правните експерти велат дека Законот за вооружени конфликти и понатаму би се применувал на цивилни трговци со дрога, а означувањето на групи како странски терористички организации не овластува автоматски употреба на смртоносна сила. Си-ен-ен објави дека неколку од погодените бродови биле или стационарни или се вртеле назад во времето на нападот, поткопувајќи го тврдењето на администрацијата дека тие претставувале непосредна закана.
Скептицизам кон воената кампања изразија и високи американски одбранбени претставници. Командантот на Јужната команда на САД, адмиралот Алвин Холси, понуди оставка за време на напнатиот состанок минатиот месец со министерот за одбрана Пит Хегсет, откако поставил прашања за легалноста на нападот. Холси ќе ја напушти функцијата во декември, само една година од неговиот мандат.
Адвокатите во Канцеларијата на главниот советник на министерството за одбрана, исто така, изразиле загриженост, а повеќе сегашни и поранешни воени адвокати изјавија за Си-ен-ен дека нападите не изгледаат легални.
Други сојузници исто така се дистанцираат
Канада, уште еден клучен сојузник на САД кој ѝ помага на крајбрежната стража да ги пресретнува осомничените шверцери на дрога речиси две децении, исто така се дистанцираше од американските воени напади.
Извори за Си-ен-ен изјавиле дека Канада има намера да го продолжи своето партнерство со крајбрежната стража, но јасно им дала до знаење на САД дека не сака нејзините разузнавачки информации да се користат за да се помогне во таргетирањето на бродови за смртоносни напади.
Портпаролот на канадската одбрана минатиот месец изјави дека „важно е да се напомене дека активностите на канадските вооружени сили како дел од Операцијата Кариби, спроведена во координација со крајбрежната стража на Соединетите Американски Држави, се одвоени и различни“ од американските воени напади врз осомничени бродови за дрога.
