Италијанската премиерка Џорџа Мелони оваа недела, зад затворени врати, го застапувала ставот на американскиот претседател Доналд Трамп пред Европската Унија, во обид да ги смири трансатлантските тензии.
На самитот во Брисел во четвртокот, Мелони им рекла на своите колеги од Европската Унија дека борбата против Трамп е лоша идеја, бидејќи Европа може сè да загуби од судирот со Америка, според четири лица запознаени со разговорите меѓу лидерите, на кои им била гарантирана анонимност, објави Политико.
Наместо тоа, таа ги повикала сите да останат смирени и да не го отпишуваат Трамп како луд или непредвидлив, како што некои функционери приватно го опишувале за време на бурниот почеток на 2026 година на меѓународен план.
По самитот, претседателката на Европската комисија, Урсула фон дер Лаен, сугерираше дека лидерите оваа недела ја научиле лекцијата дека спротивставувањето на Трамп на „цврст“, но „неескалирачки“ начин е ефикасна стратегија што треба да продолжи да се применува.
Лидерите на Европската Унија го свикаа вонредниот самит како одговор на заканата на Трамп дека ќе воведе царини за осум европски земји поради нивното противење на неговото барање САД да ја преземат контролата врз Гренланд од Данска. Кризата во трансатлантските односи доминираше во дискусиите во Брисел и во други европски престолнини, а лидерите се собраа на вечера во четвртокот за да се обидат да исцртаат стратегија за иднината.
Откако Европската Унија се закани дека ќе употреби трговски и други мерки за одмазда доколку Трамп ја реализира заканата со царините, а пазарите реагираа негативно, американскиот претседател се повлече и сигнализираше дека сака пријателски договор за Гренланд.
Информациите за интервенцијата на Мелони сугерираат дека таа сакала повнимателен пристап од некои други лидери на масата, вели Политико. Во петокот, Мелони му беше домаќин на германскиот канцелар Фридрих Мерц во Рим, каде што разговараа за продлабочување на одбранбената и индустриската соработка.
Лидерите на Европската Унија решија повторно да се сретнат следниот месец на сесија за „стратегиско промислување“ за начините на приспособување кон нов светски поредок доминиран од ривалства меѓу големите сили, со помала улога на меѓународното право.
„Нашиот впечаток беше дека големо мнозинство од лидерите навистина ги препозна последните недели како пресвртна точка и дека Европа треба брзо да дејствува на неколку фронта за да може да ги заштити своите клучни интереси“, рекло петто лице запознаено со дискусиите. „Немаше илузии дека кризата е завршена.“
