Коосновачот на Мајкрософт и филантроп истакна дека вештачката интелигенција истовремено е и „балон“ и „длабоко значајна технологија што ќе го преобликува светот“, зборувајќи вчера на Финансиската недела во Абу Даби, пренесува Со-ен-би-си.
„Вештачката интелигенција е најважното нешто што се случува“, кажа Гејтс, во услови на зголемени капитални трошоци и наплив на внатрешни инвестиции кои додаваат нервоза на пазарот. „Дали тоа значи дека сите овие компании со високи вреднувања ќе бидат победници? Не, ќе биде хиперконкурентно“.
Гејтс го разјасни своето тврдење за пазарниот балон. „Вештачката интелигенција е балон само во смисла дека не сите од овие проценки на крајот ќе се зголемат. Некои од нив ќе паднат“, кажа тој, но веднаш додаде: „Тоа е длабоко значајна технологија која ќе го преобликува светот. Нема сомнеж во тоа.“
Неговото предупредување доаѓа во време кога многу компании за вештачка интелигенција имаат проценки далеку над просекот. На пример, Палантир и Тесла имаат коефициенти П/Е – односот на цената на акциите кон заработката по акција – далеку над 200, во споредба со просекот на С&П 500 од околу 25.
Глобалните пазари забележаа пад во ноември токму поради зајакнувањето на стравовите од пукање на балонот, а Гејтс верува дека „разумен процент од овие компании нема да вредат толку многу“.
И покрај надуените проценки во некои делови од секторот, Гејтс е убеден дека вештачката интелигенција фундаментално ќе ги промени животите на подобро.
„Дали ова е длабоко и реално и дали ќе ги обезбеди сите овие придобивки, вклучувајќи ги здравството, образованието и земјоделството на кои работиме? Апсолутно, никој не треба да се сомнева во тоа“, истакна тој.
Претходно оваа недела Фондацијата Гејтс и други меѓународни лидери ветија 1,9 милијарди долари за борба против детската парализа, обезбедување вакцини за милиони деца и зајакнување на здравствените системи.
Гејтс предвиде дека следната година ќе биде клучна за глобалното здравје, делумно благодарение на примената на алатките за вештачка интелигенција.
„Можеме да ги земеме овие прекрасни ветувања кои тукушто ги добивме и да се погрижиме да ги користиме многу ефикасно. Ова ќе биде годината кога ќе пилотираме многу од тие алатки за вештачка интелигенција, како што е виртуелен лекар кој ги поддржува сите африкански дијалекти или земјоделски советник“, кажа тој.
Тој објасни како повеќето луѓе во Африка обработуваат многу мали парцели земја со ниска продуктивност. „Сакаме драматично да ја зголемиме нивната продуктивност и го гледаме тоа како изводливо“, заклучи Гејтс.
