Во тужба поднесена на Флорида Трамп го обвинува Би-би-си за клевета и кршење на законите за трговски практики. Неговиот правен тим тврди дека Би-би-си го наклеветила претседателот со „намерно, злонамерно и погрешно уредување на неговиот говор“.
Во својот говор на 6 јануари 2021 година, во пресрет на немирите во американскиот Капитол, Трамп ѝ кажа на толпата: „Ќе одиме до Капитол и ќе навиваме за нашите храбри сенатори и конгресмени“. Повеќе од 50 минути подоцна во истиот говор, тој додаде: „И се бориме. Се бориме како луди“.
Сепак, во емисијата „Панорама“ беше прикажан клип од Трамп како вели: „Ќе одиме пеш до Капитол… и јас ќе бидам таму со вас. И се бориме. Се бориме како луди“. Би-би-си призна дека таквата монтажа создала „лажен впечаток“ дека Трамп „директно повикал на насилни дејствија“, но во исто време го отфрли тврдењето дека има основа за тужба за клевета.
Портпаролот на Би-би-си кратко кажа: „Како што јасно ставивме до знаење претходно, ќе се браниме во овој случај. Нема да коментираме понатаму за тековните судски постапки“. Трамп минатиот месец објави дека планира да го тужи Би-би-си поради емитување на документарен филм во Обединетото Кралство пред изборите во САД во 2024 година.
„Мислам дека морам да го направам тоа“, им кажа тој на новинарите во тоа време. „Тие лажеа. Ги сменија зборовите кои излегоа од мојата уста“. Спорната монтажа предизвика и потрес во самата медиумска куќа.
Во ноември протече интерен меморандум на Би-би-си во кој се критикуваше начинот на кој беше монтиран говорот, што на крајот доведе до оставки на генералниот директор Тим Дејви и раководителката на вестите Дебора Тернес.
Пред поднесувањето на тужбата, адвокатите на Би-би-си детално одговорија на тврдењата на претседателот. Тие изјавија дека немало злонамерна намера во монтажата и дека Трамп не претрпел никаква штета, бидејќи кратко по емитувањето на емисијата, тој беше повторно избран за претседател.
Тие исто така истакнаа дека Би-би-си немале права ниту ја дистрибуирале „Панорама“ на своите американски канали. Иако документарецот бил достапен на Би-би-си ајплеер, пристапот бил ограничен на гледачите во Обединетото Кралство.
Од друга страна, Трамп во својата тужба ги наведува договорите кои Би-би-си ги имала со други дистрибутери, особено со една медиумска корпорација која наводно имала права да го лиценцира документарецот надвор од Велика Британија. Во тужбата, исто така, се тврди дека луѓето на Флорида можеле да пристапат до програмата користејќи ВПН или преку услугата за стриминг Бритбокс.
„Промоцијата на документарецот „Панорама“, заедно со значителното зголемување на употребата на ВПН на Флорида од неговото деби, наметнува силна веројатност дека граѓаните на Флорида пристапиле до документарецот пред Би-би-си да го отстрани“, се наведува во тужбата.
Голем број британски политичари застанаа во одбрана на јавниот сервис. Министерот за здравство Стивен Кинок кажа дека Би-би-си имал право што „цврсто стои“ пред тужбата на Трамп.
„Мислам дека се извинија за една или две грешки кои беа направени во таа програма „Панорама“, но исто така беа многу јасни дека нема основа за одговор на обвинувањата на господинот Трамп во пошироката смисла на клевета“, изјави тој за Скај њуз, додавајќи дека Лабуристичката партија „секогаш ќе стои зад Би-би-си како витално важна институција“.
Најџел Хадлстон, министерот за култура во сенка, кажа дека премиерот треба „да го искористи своето очигледно влијание за да му објасни на претседателот дека тужбата против Би-би-си ќе има негативно влијание врз претплатниците“. Лидерот на либералните демократи Ед Дејви го повика премиерот Кир Стармер да му каже на Трамп дека неговата одлука да го тужи Би-би-си е „неприфатлива“.
Ова е само последната во серијата тужби поднесени од Трамп против медиумски компании. Во минатото, тој тужеше неколку американски медиумски компании за повеќемилионски суми, обезбедувајќи повеќемилионски спогодби во некои случаи.
Крис Ради, основач и извршен директор на конзервативниот американски медиум Њузмакс медиа и сојузник на Трамп, изјави за Би-би-си дека е тешко да се добие тужба за клевета во САД бидејќи „реперот е поставен многу високо“. Сепак, тој предложи Би-би-си да се спогоди за да ги избегне судските трошоци, кои ги процени на помеѓу 50 и 100 милиони долари.
Од друга страна, поранешниот контролор на Би-би-си радио Марк Дамасер верува дека би било „исклучително штетно за угледот на Би-би-си да не се бори во овој случај“.
„Станува збор за независноста на Би-би-си и, за разлика од американските медиумски организации кои платиле пари, Би-би-си нема комерцијални деловни интереси кои зависат од наклонетоста на претседателот Трамп во Белата куќа“, изјави тој за програмата „Денес“ на Би-би-си радио четири.
