Забраната, која ја предложи владејачката коалиција од три центристички партии, беше поддржана од крајно десничарската Партија на слободата (ФПО), која беше единствената што побара таа да се примени и на училишниот персонал. Единствената партија што се спротивстави на предложената забрана беше најмалата парламентарна партија, Зелените, тврдејќи дека е неуставна.
Групите за човекови права го критикуваа планот. Амнести интернешнл предупреди дека тој „ќе придонесе кон сегашната клима на расизам против муслиманите“. Телото што официјално ги претставува австриските муслимани ИГГО го нарече пример за кршење на основните права.
„Не станува збор за ограничување на слободата, туку за заштита на слободата на девојчињата до 14 години“, изјави во Долниот дом Јаник Шети, раководител на клубот на либералната партија Неос, најмладата партија во владејачката коалиција. „Покривањето на главата не е само парче облека. Таа служи, особено за малолетниците, за заштита на девојчињата од машки поглед. Ги сексуализира девојчињата“, кажа тој.
Заменичката министерка за интеграција Клаудија Плаколм од конзервативната Народна партија, која ја предводи владејачката коалиција, ги нарече покривањата на главата за малолетници „симбол на угнетување“. Забраната се однесува на „сите форми“ на исламски капи, вклучувајќи хиџаби и бурки, и ќе стапи во целосна сила на почетокот на следната учебна година во септември, додаде министерката.
Во февруари треба да започне првата фаза од законот, за време на која новите правила ќе им бидат објаснети на наставниците, родителите и децата. Нема да има казни за нивно кршење. Но, за повторно непочитување на новите правила, родителите би можеле да бидат казнети помеѓу 150 и 800 евра.
Уставниот суд на Австрија пресуди во 2020 година дека претходната забрана, која се однесуваше на деца под 10 години во училиштата, е нелегална бидејќи ги дискриминира муслиманите и дека државата има должност да биде религиозно неутрална. Тој пресуди дека закон спротивен на тој принцип ќе бара посебно оправдување.
Шети кажа дека владата нарачала студија за да се обиде да го исполни тој услов, и дека таа е сè уште во тек. Тој не даде детали за нејзината содржина.
Министерот за образование Кристоф Видеркер од Неос кажа дека младите девојки се под зголемен притисок од своите семејства, но и од момчиња со кои не се во роднинска врска, кои им кажуваат што да носат од „религиозни причини“.
Заменик-претседателката на клубот на Зелените Зигрид Маурер се согласи дека ова е проблем и предложи формирање интердисциплинарни тимови во кои ќе бидат вклучени претставници на муслиманската заедница за да интервенираат во училиштата кога „културните тензии“ се зголемуваат.
Околу 12.000 девојки ќе бидат опфатени со новиот закон, соопшти владата, врз основа на анкета од 2019 година која покажала дека пред шест години околу 3.000 девојки под 14 години носеле покривки за глава.
Во 2004 година француските власти им забранија на децата во училиштата да носат „знаци или облека кои јасно ја покажуваат религиозната припадност на учениците“, како што се шалови, турбани или еврејски јармулки, врз основа на секуларните закони на земјата насочени кон гарантирање на неутралност во државните институции.
