Костас Лагувардос, директор за истражување во Националната опсерваторија во Атина, кажа дека во главниот град на Грција паднале до 170 милиметри дожд. Ова изнесува „околу 40 проценти од годишните дождови кои паѓаат во Атина“, објасни Лагувардос на маргините од презентацијата на годишните метеоролошки податоци за Грција.
Невремето кое ја зафати земјата во средата одзеде два живота, а спасувачките екипи денес го поминаа денот расчистувајќи ги урнатините. Синоќа, 56-годишна жена починала откако била однесена од порој и заробена под автомобил во атинското предградие Ано Глифада.
Severe flooding has struck Glyfada in southern Athens after extreme rainfall.
Follow: https://t.co/7Dg3b41hTx pic.twitter.com/9UZYXRbX6G
— PressTV Extra (@PresstvExtra) January 22, 2026
Неколку часа претходно, во пристанишниот град Астрос на Пелопонез, 53-годишен припадник на крајбрежната стража бил удрен од бран додека помагал на локалното население да ги врзат бродовите и бил смртно повреден. Бурата се движела кон исток низ Грција со ветрови со брзина од над 100 километри на час, што ги натера властите во Атина и на запад и југ од земјата да ги затворат училиштата.
Противпожарната служба соопшти дека одговорила на повеќе од 900 итни повици поврзани со поплави низ целиот главен град. Премиерот Киријакос Мицотакис го откажа планираното патување на Светскиот економски форум во Давос.
Смртоносните поплави за време на интензивните дождови во последните години ги принудија властите да го подобрат системот за одбрана од поплави. Во септември 2023 година, земјоделскиот регион Тесалија беше погоден од катастрофална бура во загинаа 17 лица и беа убиени стотици илјади домашни животни.
Во ноември 2017 година, обилните дождови во Мандра, полурурална област во близина на Атина, одзедоа 25 животи. Експертите постојано повикуваат на надградба на инфраструктурата, особено во пошироката област на Атина, која е опкружена со планини и пресечена со стотици водни текови, од кои повеќето се покриени поради неконтролираната урбанизација во последните децении.
