Астронаутите на НАСА Реид Вајзман, Виктор Гловер и Кристина Кох, како и астронаутот на Канадската вселенска агенција Џереми Хансен, пристигнаа со авиони нортроп Т-38 од Хјустон, Тексас, до вселенскиот центар „Кенеди“, од каде што може да полетаат најрано на 1 април со ракетата „Спејс лонч систем“ (СЛС), пренесе Ројтерс.
Тие ќе патуваат во капсулата „Орајон“, дизајнирана за човечки мисии во длабока вселена. Мисијата, која ќе трае околу 10 дена, ќе ја однесе екипата во брз лет околу Месечината и назад.
„Нацијата и светот долго време чекаа повторно да го направиме ова“, изјави командантот на мисијата Вајзман по пристигнувањето, додавајќи дека тој и неговите колеги „се навистина возбудени што ќе го направат ова“.
„Имаше многу работа. Беше одлично патување, убаво е да се биде тука во топлиот воздух на Флорида“, додаде тој.
„Артемис II“ ќе биде првата мисија со екипаж во рамките на програмата „Артемис“ на НАСА, вредна повеќе милијарди. Иако нема да се изведе слетување на Месечината, мисијата ќе ги однесе астронаутите подалеку од Земјата од која било претходна човечка вселенска мисија, тестирајќи ги системите за одржување живот, навигацијата, комуникациите и топлинската заштита на „Орајон“.
Компанијата Боинг е главен изведувач за централниот степен на ракетата СЛС, Нортроп Груман ги произведува ракетните засилувачи на цврсто гориво, а Локхид Мартин ја произведува капсулата „Орајон“.
Екипата помина повеќе од две години во обука откако беше избрана во 2023 година. Од 18 март се наоѓаат во стандарден карантин пред лет во вселенскиот центар „Џонсон“ во Хјустон и пред лансирањето треба да се преселат во просториите за екипаж во Флорида.
Гловер, пилотот на мисијата, ќе стане првиот црн астронаут што ќе патува во близина на Месечината. Кох ќе биде првата жена што ќе го стори тоа, додека Хансен ќе биде првиот неамерикански астронаут што ќе отиде подалеку од ниската орбита на Земјата.
Сите членови на екипажот освен Хансен претходно биле во вселената. Вајзман изјави дека се подготвени за сите можни сценарија.
„Кога ќе ја напуштиме планетата, можеби ќе се вратиме веднаш, можеби ќе поминеме три или четири дена околу Земјата, можеби ќе одиме до Месечината — таму сакаме да одиме“, рече Вајзман. „Но ова е тест-мисија и подготвени сме за секое сценарио.“
Искусен екипаж
Вајзман, 50 години, поминал 165 дена на Меѓународната вселенска станица за време на мисија во 2014 година со руското летало „Сојуз“. Поранешен тест-пилот на американската морнарица, подоцна бил главен астронаут на НАСА.
Гловер, 49 години, поминал 168 дена во вселената почнувајќи од 2020 година како пилот на мисијата „Кру-1“, првата оперативна мисија кон Меѓународната вселенска станица со капсулата „Кру Драгон“ на Спејсекс.
Кох, 47 години, во 2019 година постави рекорд за најдолг непрекинат престој во вселената од страна на жена — 328 дена. Таа е обучена како електроинженер и физичар и претходно работела како инженер во НАСА, како и на истражувачки мисии на Антарктикот.
Ова ќе биде првата вселенска мисија за Хансен, 50 години, кој беше избран за канадски астронаут во 2009 година. Неговото учество е дел од долгогодишната соработка меѓу САД и Канада во човечките вселенски мисии, вклучително и придонесот на Канада во роботиката на Меѓународната вселенска станица.
НАСА планира и нови мисии „Артемис“ во наредните години, со цел долгорочно човечко присуство на Месечината и идни мисии со екипаж кон Марс.
