Американската државна обвинителка Пем Бонди изјави денес дека им наложила на сојузните обвинители да бараат смртна каза за, како што наведе, „планираното, ладнокрвно убиство“.
Томсон беше убиен пред хотел во Њујорк на 4 декември. Полицијата го уапси 26-годишниот Манџионе во Пенсилванија, по повеќедневна потрага низ земјата.
26-годишникот, кој е обвинет за убиството на извршниот директор на Јунајтед хелткер Томсон, претходно пред државниот суд во Њујорк се изјасни дека не е виновен по 11 точки на обвинението.
Порота на Менхетн го обвини за убиство како терористички чин, кривично поседување оружје и кривично поседување фалсификувани документи. Исто така, се соочува со обвиненија во Пенсилванија каде беше уапсен пет дена по пукањето.
Манџионе беше фатен во Мекдоналдс во Пенсилванија по петдневна потрага. Тој имал пиштол кој одговара на тој кој бил користен во пукањето и лажна лична карта, соопшти полицијата.
Тој освен државното судење, се соочува и со сојузни обвинувања. Двата случаи ќе продолжат паралелно, соопштија претходно обвинителите.
Сојузните обвиненија вклучуваат кривично дело употреба на огнено оружје за извршување убиство, што носи максимална казна смртна казна или доживотен затвор, едно кривично дело меѓудржавно следење со смртни последици, едно кривично дело следење преку меѓудржавни средства со смртни последици (двете со максимална казна доживотен затвор) и едно кривично дело пукање од огнено оружје за извршување насилно злосторство казна од 30 години затвор до доживотен затвор).
