Демантот дојде откако Голдберг објави напис во кој тврди дека ненамерно бил додаден во групен разговор на апликацијата Сигнал, каде претставници на администрацијата на Трамп разговарале за плановите за воени напади против Хутите во Јемен.
Ова очигледно нарушување на безбедноста предизвика интензивна двопартиска загриженост и надзор во Вашингтон, при што пратениците од двете партии повикаа на итна истрага, пишува Њузвик.
Инцидентот, според Њузвик, покренува сериозни прашања за оперативната безбедност на највисоките нивоа на апаратот за национална безбедност, што потенцијално ги загрозува чувствителните воени операции.
Според извештајот на Атлантик, Голдберг бил додаден во групен разговор на апликацијата Сигнал наречена „Хути ПС мала група“ во која биле вклучени високи функционери како советникот за национална безбедност Мајк Волц, државниот секретар Марко Рубио, потпретседателот Џеј Ди Ванс и Хегсет. Разговорот наводно содржел конкретни оперативни детали за планираните напади врз цели на Хутите во Јемен.
Хегсет го изнесе својот демант додека беше на Хаваи, каде води службени работи, вклучувајќи состаноци со цивилни и воени лидери во Индо-пацифичката команда. Неговата посета вклучува обиколка на американските воени инсталации на Гуам, добивање брифинг за оперативните способности и продолжување на патувањето до Филипините и Јапонија.
Советот за национална безбедност (НСЦ) ја потврди автентичноста на ланецот на пораки, наведувајќи дека „се чини дека е автентичен“ и дека „прегледуваат како ненамерен број бил додаден во групниот разговор“.
Министерот за одбрана Пит Хегсет ги демантираше пораките до новинарот. „Зборувате за измамник и високо дискредитиран таканаречен новинар кој од продавање измами направи професија… Ова е тип што тргува со ѓубре… Никој не праќал текстуални пораки со воени планови и тоа е сè што имам да кажам“.
Reporter: Can you share how your information about war plans was shared with a journalist?
Hegseth: So you are talking about a deceitful and highly discredited so-called journalist who has made a profession of peddling hoaxes pic.twitter.com/JXegFXbdpP
— Acyn (@Acyn) March 24, 2025
Џефри Голдберг, главен уредник на Атлантик, му одговори на Хегсет за време на интервју за Ем-ес-ен-би-си. „Министерот за одбрана изгледа како личност која е несериозна и се обидува да го оттргне вниманието од фактот дека учествувал во разговор на некласифицирана апликација за размена на пораки во која веројатно не требало да учествува“.
Брајан Хјуз, портпарол на НСЦ, ја потврди автентичноста на групниот разговор. „Се чини дека ова е автентичен ланец на пораки и ние разгледуваме како ненамерниот број е додаден на ланецот. Континуираниот успех на операцијата за Хутите покажува дека немало закани за војниците или националната безбедност“.
Поранешниот директор на ЦИА, Леон Панета, тоа го нарече „многу сериозна грешка“ што може да ги прекрши законите за шпионажа и да ја загрози нивната национална безбедност.
Претседателот Доналд Трамп тврди дека не знае ништо за инцидентот. „Не знам ништо за тоа. Не сум голем обожавател на Атлантик. За мене тоа е медиум што пропаѓа. Но, не знам ништо за тоа. Сакате да кажете дека имале нешто?“.
Пратеникот Пет Рајан, њујоршки демократ кој е член на Комитетот за вооружени служби, објави на социјалните мрежи: „Ако републиканците во Претставничкиот дом не одржат сослушување ВЕДНАШ за тоа како се случило ова, јас ќе го сторам тоа сам“.
