Претседателот Доналд Трамп се фали со работата на својата администрација, но неодамнешните анкети укажуваат дека Американците сè повеќе се фрустрирани од неговото раководење.
Многу Американци велат дека Трамп се фокусира на погрешни приоритети, покажуваат повеќе анкети, вклучително и анкетата на АП–НОРЦ од јануари, и во голема мера сметаат дека Трамп го занемарува прашањето на трошоците за живот. Неговите проблеми дополнително се влошуваат поради знаци дека расте фрустрацијата околу неговиот пристап кон имиграцијата, а некои од неговите неодамнешни фиксации, како преземањето на Гренланд, се целосно непопуларни.
Ова му создава проблеми на Трамп во момент кога неговата партија влегува во година на конгресни избори. Американците не мислат дека тој ѝ посветува доволно внимание на економијата и многумина сакаат помал фокус на имиграцијата и надворешната политика. Но токму тие прашања доминираа во насловите во текот на изминатиот месец, благодарение на агресивниот пристап на Трамп.
Трамп беше реизбран главно поради економските проблеми, но неодамнешните анкети покажуваат дека мнозинството Американци сè уште не ги гледаат придобивките од неговата политика и дека повеќето не сметаат оти тој ѝ посветува доволно внимание на економијата.
Голем дел од регистрираните гласачи ја гледаат економијата како едно од главните прашања во САД, а една неодамнешна анкета на Њујорк тајмс покажа дека околу половина од регистрираните гласачи велат оти политиката на Трамп го направила животот на мнозинството Американци „помалку пристапен“.
Слично на тоа, околу 70 отсто од регистрираните гласачи во нова анкета на Фокс њуз изјавиле дека Трамп не поминува доволно време фокусирајќи се на економијата, што ги вклучува и околу половина од неговите републиканци.
Околу 40 отсто од гласачите во анкетата на Фокс њуз рекле дека економската политика на Трамп лично им „наштетила“, а сличен процент рекле дека таа политика ништо не им променила. Само околу 20 отсто велат дека економскиот курс на претседателот им користел — а 45 отсто од гласачите велат дека очекуваат економијата да се „влоши“ во наредната година.
Иако многу Американци и понатаму ја поддржуваат целта на Трамп за депортација на нелегалните лица од САД, анкетите покажуваат дека тие се сè понезадоволни од неговата имиграциска тактика.
Околу 60 отсто од регистрираните гласачи во анкета на Њујорк тајмс изјавиле дека тактиката на Службата за царина и имиграција (Ајс) „отишла предалеку“. Анкетата на Фокс њуз покажа дека сличен удел гласачи сметаат дека Ајс е „премногу агресивна“ во своите напори за депортација на нелегални имигранти, што претставува зголемување од 10 проценти во однос на јули.
Тие анкети, спроведени пред агентите на Граничната патрола во Минеаполис да го убијат Алекс Прети, укажуваат на широко незадоволство кај Американците од постапките на имиграциските службеници во градовите низ САД, уште пред ситуацијата во Минесота дополнително да се влоши.
Имиграцијата беше меѓу најсилните прашања на Трамп во анкетите на АП–НОРЦ кога го започна својот втор мандат, но оттогаш таа поддршка опадна. Само 38 отсто од возрасните во САД одобруваат како Трамп постапува со имиграцијата, што претставува пад од 49 отсто во март. Анкетата беше спроведена од 8 до 11 јануари, набргу по смртта на Рене Гуд, првата граѓанка убиена од службеник на Ајс во Минеаполис.
Постојат и индикации дека одобрувањето на односот на Трамп кон имиграцијата може да опадне и меѓу републиканците. Поддршката падна од 88 отсто во март на 76 отсто во анкетата на АП–НОРЦ во јануари, што претставува очигледна промена меѓу неговите поддржувачи во текот на првата година од неговото враќање на функцијата.
Само во последните неколку недели Трамп размислуваше за преземање контрола над Гренланд, се залагаше за контрола на САД врз венецуелската нафта и за казнување на Иран поради убиството на илјадници мирни демонстранти.
Анкетите покажуваат дека многу Американци сакаат Трамп повеќе да се фокусира на домашните прашања. Околу 40 отсто од гласачите сакаат Трамп помалку да се фокусира на надворешната политика, покажа анкетата на Фокс. Приближно една третина од Американците рекле дека времето што Трамп ѝ го посветува на надворешната политика е „отприлика соодветно“, а околу 30 отсто дека не ѝ посветува доволно време.
Контролата врз Гренланд е непопуларно прашање за Трамп. Една неодамнешна анкета на истражувачкиот центар Пју покажа дека околу 60 отсто од Американците силно или умерено се противат на преземањето на Гренланд од страна на САД, како што предложи Трамп. Републиканците беа поделени: околу 40 отсто беа за преземање на Гренланд, но околу една третина беа против. Околу една четвртина не беа сигурни што да одговорат.
Трамп е истакната политичка фигура веќе околу една деценија, а неговите поддржувачи му останаа лојални и покрај неговото нетрадиционално или дрско однесување во Белата куќа. Анкетите често покажуваа дека приоритетните прашања повеќе ги движат гласачите отколку карактерот на функционерите.
И покрај тоа, постои можно предупредување за Трамп во новата анкета на истражувачкиот центар Пју, која покажува дека нешто повеќе од половина републиканци, 56 отсто, ги поддржуваат „сите“ или „повеќето“ од плановите и политиките на Трамп, наспроти 67 отсто веднаш по неговото стапување на должност минатата година.
Анкетата исто така откри остар пад на довербата кај републиканците дека Трамп има ментална способност да биде претседател, дека ги почитува демократските вредности на САД или дека се однесува етички на функцијата. Само околу 40 отсто од републиканците сега велат дека се „исклучително“ или „многу“ уверени во етичкото однесување на Трамп, што претставува пад од 55-те отсто во почетокот на минатата година.
Дополнително загрижувачки за Трамп, со оглед на неговиот фокус на менталната способност на неговиот претходник, е фактот дека околу 66 отсто од републиканците сега се „многу уверени“ дека Трамп ја има менталната способност потребна за извршување на функцијата претседател. Тоа е пад во однос на 75 отсто во почетокот на неговиот втор мандат.
