Министерот Бесент не даде детали за купувањето на аргентинска валута ниту оваа недела. Во објавата од минатата недела на социјалната мрежа Икс тој напиша дека „Аргентина во моментов има акутен проблем со неликвидност“.
„Меѓународната заедница – вклучувајќи го и ММФ – е обединета во поддршката на Аргентина и нејзината стратегија за фискално штедење, но само САД можат да дејствуваат брзо и ние ќе дејствуваме. Затоа директно купивме аргентински пезоси“, кажа Бесент минатата недела.
Кон средината на септември Централната банка на Аргентина продаде вкупно 1,1 милијарда долари за три дена за да го поддржи пезосот и да ја задоволи зголемената побарувачка на институционалните инвеститори за американската валута во услови на незадоволство на граѓаните од политиката на штедење.
Американскиот секретар за финансии потоа изјави дека „сите опции за стабилизација“ и помош за Аргентина се на маса, вклучувајќи механизам за размена на валути, директно купување пезоси, но и аргентинскиот државен долг деноминиран во долари преку Фондот за стабилизација на девизниот курс при министерството за финансии.
Бесент потврди дека САД ќе воспостават механизам за размена на валути во вредност од 20 милијарди долари со аргентинската централна банка.
На новинарското прашање дали операциите со пезоси ќе одат рака под рака со купувањето на аргентинскиот долг, Бесент не ја исклучи таа можност, но одби да навлегува во детали.
Подготовките за создавање инструмент кој ќе му овозможи на приватниот сектор да инвестира во аргентинскиот долг во долари почнаа пред неколку недели, но министерот не кажа кога би можел да заврши. „Затоа, тоа е решение на приватниот сектор за отплата на аргентинскиот долг. Бројни банки, како и бројни државни стабилизациски фондови, покажаа интерес“, тврди американскиот министер за финансии.
Аргентинскиот министер за економија Луис Капуто во средата во Буенос Аирес изјави дека се надева дека „многу брзо“ ќе ги исполни условите за воспоставување механизам за размена на валути од 20 милијарди долари, додавајќи дека идеално би било да биде во функција пред изборите на 26 октомври.
Кабинетот на Трамп не објави детали за финализираниот договор за размената на валути што треба да ја подобри ликвидноста на аргентинскиот пазар. Бесент, сепак, потврди дека тој ќе биде поддржан од Специјалните права за извлекување (СДР), со „валута“ на Меѓународниот монетарен фонд која министерството ја чува во Фондот за стабилизација на девизниот курс.
Специјалните права за извлекување ќе бидат конвертирани во долари, објасни Бесент. На прашањето на новинарите дали САД ќе го преземат статусот на преференцијален кредитор пред ММФ или кредиторите од приватниот сектор, Бесент одговори: „Не, Кина го прави тоа, ние не“.
Со поддршката на Аргентина, Вашингтон не се обидува да го ублажи системскиот ризик, нагласи Бесент, Аргентина е камен-темелник на американската „Доктрина Монро“ во економската сфера, објасни тој, осврнувајќи се на американската доктрина за надворешна политика од 1823 година, која прецизно ја дефинира Јужна Америка како централна област од интерес.
Во меѓувреме, Кина ги зајакнува врските со Јужна Америка и воспостави линија за размена на валута од 18 милијарди долари со аргентинската централна банка.
На прашањето дали Вашингтон ги поставил условите за воспоставување механизам за размена на валута, гувернерот на аргентинската централна банка Сантијаго Баусили не одговори директно, посочувајќи ја изјавата на американскиот секретар за финансии дека Вашингтон не е загрижен за договорот меѓу Кина и аргентинската централна банка, пишува весникот Буенос Аирес тајмс.
