Во извештајот подготвен за конференцијата која започнува во петок, авторите предупредија дека најголемиот предизвик за либералниот меѓународен поредок доаѓа одвнатре, преку драматична промена во размислувањето на американската администрација за нејзините сојузи.
Витакер истакна дека САД не сакаат да го распуштат НАТО или да ги поткопаат сојузите – на што алудираат авторите на извештајот – туку дека тие само сакаат да ја „балансираат“ распределбата на одбранбените оптоварувања меѓу земјите-членки на НАТО и ги повика европските сојузници да „сторат повеќе за да бидат способни и силни, бидејќи силата гарантира мир“.
„Тоа е првото нешто што го отфрлам, ние се обидуваме да го направиме НАТО посилен, не да се повлечеме од него или да го фрлиме, туку да го направиме да функционира онака како што е наменето, како сојуз од 32 силни и способни сојузници“, кажа Витакер.
На прашањето зошто американскиот министер за одбрана Пит Хегсет нема да присуствува на министерскиот состанок на НАТО во четврток, Витакер кажа дека сојузниците не треба да му придаваат важност и дека „светот е голем и има само еден министер за одбрана кој мора да биде на многу места“.
Тој кажа дека заменик-министерот, потсекретарот Елбриџ Колби, е „совршената личност“ за да разговара за безбедносната стратегија на САД и за американскиот поглед на Европа „сега и во иднина“ и да разговара за „(американските) капацитети кои на крајот треба да се преместат од Европа и да се заменат со европски капацитети“.
Амбасадорот кажа дека очекува Европа да се „изедначи“ – „да биде посилна и да го сподели товарот на европската безбедност со Соединетите Држави и на крајот да ја преземе конвенционалната одбрана на европскиот континент, со сеопфатниот американски нуклеарен чадор“.
Витакер кажа дека европските партнери треба да ги зголемат трошоците за одбрана и да покажат дека можат да ги „исполнат“ ветувањата, вклучително и новите цели за трошоци на НАТО.
Витакер истакна дека САД сакаат да се спротивстават на „нефер“ трговските договори со Европа кои резултирале со тоа што „Европа го искористи тоа и оствари огромни трговски суфицити со САД“.
Тој кажа дека САД се фрустрирани затоа што има „многу разговори, а не толку многу акција“ Европа и дека сојузниците поминуваат повеќе време дискутирајќи за проблемите отколку што ги решаваат.
На прашањето за Гренланд, тој кажа дека американскиот интерес е само безбедноста на Гренланд, или како дел од Данска, или „како независна земја во иднина“, за да може да се одбрани од Русија и Кина.
„Кинезите направија најмалку два обида кон Гренланд. Едниот преку пристаништа обидувајќи се да инвестираат во пристаништа (на Гренланд), а другиот преку обид да инвестираат во аеродром“, кажа Витакер, а весникот Гардијан посочува дека данските власти се сомневаат во тие тврдења.
Делувајќи како да се дистанцира од агресивната реторика на американскиот претседател Доналд Трамп за Гренланд, амбасадорот кажа дека за време на првиот мандат на Трамп, научил дека одговарањето на секоја порака од Трамп преку мрежата Трут соушал или Твитер би било „постојана работа“, но сепак кажа дека безбедносната анализа која е основа на ставовите на Трамп е исправна.
