Израел со поддршка на Трамп го нападна Иран минатиот јуни, само неколку дена пред планираниот круг нуклеарни преговори. Слично сценарио се повтори и пред три недели, кога САД и Иран во Женева постигнаа привремен договор за продолжување на дијалогот, за само два дена подоцна да следува заеднички американско-израелски напад.
Иранските функционери им пренеле на посредниците — Пакистан, Египет и Турција — дека американските воени маневри и испраќањето засилувања само ја продлабочуваат нивната сомничавост дека повикот за преговори е само измама. Од друга страна, администрацијата на Трамп натрупувањето сили го толкува како знак дека сериозно има намера да преговара од позиција на сила, а не со лоша намера.
„Трамп со едната рака нуди договор, а другата му е стегната во тупаница, подготвена да те удри среде еб*ното лице“, сликовито опиша еден советник на Трамп.
За да го убеди Техеран во сериозноста на своите намери, Белата куќа им испратила порака на Иранците дека во разговорите би можел да се вклучи и потпретседателот Џеј Ди Венс. Два извори наведуваат дека Венс го предложил Виткоф поради угледот на неговата функција, но и затоа што Иранците не го сметаат за „јастреб“, односно воен хушкач.
Во очигледен обид за градење доверба, Трамп во вторникот им зборуваше на новинарите за еден ирански гест. „Вчера направија нешто навистина неверојатно. Ни испратија подарок што пристигна денес. Станува збор за многу голем подарок, со огромна парична вредност“, изјави Трамп без да открие детали, освен дека „подарокот“ е поврзан со „нафта и гас“ и со протокот низ Ормускиот теснец.
Тој тврдеше дека тоа покажува дека САД преговараат со вистинските луѓе во Техеран. „Рекоа дека ќе го направат тоа и го направија, а тие се единствените што можеа да го направат тоа“, додаде тој. Но американски и израелски функционери истакнуваат дека Трамп истовремено развива и дипломатски и воени опции за да може да реагира во зависност од развојот на ситуацијата.
Според нив, планирани се уште две до три недели воени дејствија, дури и ако преговорите почнат. Дека воениот притисок продолжува потврди и самиот Трамп, кој во вторникот му нареди на министерот за одбрана Пит Хегсет да не го намалува. „Преговараме со бомби“, кратко им порача Хегсет на новинарите во Овалната соба.
И покрај дипломатските напори, Пентагон не ги променил наредбите до Централната команда на САД за воените операции и планирање. Во наредните денови и недели се очекува пристигнување дополнителни засилувања на Блискиот Исток, вклучувајќи неколку ескадрили борбени авиони и илјадници војници.
Една експедициска единица на маринци треба да пристигне веќе оваа недела, а наскоро се очекува и распоредување на уште една. Командата на 82-та воздушно-десантна дивизија исто така доби наредба за распоредување на Блискиот Исток, заедно со пешадиска бригада од неколку илјади војници.
Функционер од Белата куќа потврдил дека и копнена операција е една од опциите, но нагласил дека Трамп сè уште не донел одлука. Според изворите, Иранците во понеделникот наутро преку посредници примиле американски план од 15 точки, само неколку часа пред Трамп јавно да открие дека се водат разговори.
САД сакаат планот да се разгледува како целина, што би опфатило прекин на војната, повторно отворање на Ормускиот теснец, укинување на санкциите и гаранции за иранските нуклеарни активности, ракетната програма и поддршката на сојузничките групи.
Вашингтон го смета овој план за основа за преговори и сака за него да се разговара на средба во живо во Пакистан овој четврток. Функционер од Белата куќа изјави дека Трамп е оптимист во врска со преговорите и дека средбата во Пакистан е можна, иако сè уште ништо не е финализирано.
Од Белата куќа порачуваат дека иранскиот приоритет е да се запре бомбардирањето и да се обезбеди примирје, додека САД сакаат да видат дали Техеран е подготвен на отстапки на кои не бил подготвен во претходните разговори. Двете страни, сепак, добро паметат како завршија тие претходни преговори.
