„Дефинитивно го исклучувам тоа, постојано повторуваме дека никогаш нема да дозволиме референдум за излегување од Европската Унија и НАТО. Ако сакате, сега, ќе ви го потпишам тука“, кажа Бабиш во дебата со актуелниот премиер Петр Фијала на Си-ен-ен прима њуз.
Бабиш кажа и дека не сака нереформирани комунисти да влезат во неговата влада, иако според анкетите расположението на чешките гласачи е такво што Бабиш навистина може да очекува изборна победа од 27 до 32 отсто од гласовите, но не доволно за да формира влада без екстремната десница и левицата.
Токму радикалните националисти од партијата Слобода директна демократија и нереформираните комунисти, заедно со дел од социјалдемократите во движењето Доста, ја условуваат поддршката за евентуалната влада на Бабиш со референдум за ЕУ и НАТО.
Бабиш изјави дека сака да формира еднопартиска влада која би била поддржана од некои помали партии во парламентот, а воедно би ја исклучил соработката со партии и коалиции од централно-десничарската влада на премиерот Фијала.
Бабиш, како и премиерот Фијала, во дебатата се заложи за зајакнување и модернизација на чешката армија, но Бабиш смета дека е важно да се ревидираат приоритетите и да се инвестира повеќе во платите на војниците, за да се запре нивниот одлив и во противвоздушна одбрана и одбрана од беспилотни летала.
„Кога бев премиер му објаснив на Трамп дека е погрешно да се зборува за проценти од БДП за одбраната, бидејќи тоа е различно во секоја земја“, кажа Бабиш, наведувајќи како пример мала земја која има 800 војници, од кои половина свират во воениот оркестар, и дека нема за што да потроши три отсто од БДП.
„Сега ги гледаме провокациите на Русија. Преку Полска прелетаа 21 дрон, земјите од ЕУ ги надлетуваат руски авиони. Сакаме силна армија, силна воздушна одбрана и одбрана од беспилотни летала. Не е прашање на процентот на распределба, туку да можеме да ја заштитиме нашата земја“, кажа Бабиш.
Можниот иден премиер кажа дека чешката воена индустрија сигурно ќе продава оружје на Украина и дека неговата влада ќе одобри извозни лиценци без никакви проблеми во врска со другото контроверзно прашање за кое неговата АНО и радикалните комунисти и националисти се обидуваат да освојат политички поени, одбивањето на воена помош за Украина.
„Но, тука немаме пари за нашиот народ, нашата програма е за нашиот народ, ние не сме тука во Украина, туку во Чешка. Ние ѝ даваме на ЕУ 2,5 милијарди евра во буџетот, а ЕУ има средства од кои дава пари на Украина“, кажа Бабиш, велејќи дека верува оти помошта од Чешка преку ЕУ, заедно со испораките на комерцијално оружје, е доволна.
За време на претходните разговори и на предизборните митинзи, Бабиш повтори дека ќе ја откаже Чешката иницијатива за муниција за Украина, во која Чешка посредува и бара артилериска муниција од трети земји, која ја плаќаат развиените западни земји од таа иницијатива, а досега тие испратиле 1,5 милиони парчиња артилериска муниција во Украина како подарок.
Во дебатата премиерот Фијала остро го критикуваше Бабиш за тоа што ги става парите за Чесите против парите за Украина.
„Ова значи дека нема да ѝ помагаме на Украина. Се плашам од вашата реторика околу парите за нашата безбедност. Украина се бори за нашата безбедност, во Европа постои консензус дека треба да ѝ помогнеме бидејќи тоа е основниот механизам за одвраќање на Русија и парите треба да се инвестираат во тоа“, кажа Фијала.
Актуелниот премиер им порача на гласачите да излезат на гласачките места и со својот глас да одлучат дали сакаат Бабиш да ги одвлече некаде на Исток со помош на екстремистите од десницата и левицата или сакаат да останат во „заедницата на демократски земји“.
