Иако украинскиот претседател Володимир Зеленски се надеваше дека ќе се сретне лично со Путин во Истанбул, руската делегација ја сочинуваат само пониско рангирани функционери.
Отсуството на Путин, пишува АФП, ќе ја намали важноста на првите директни преговори по неуспешниот обид на двете страни да постигнат договор неколку недели по почетокот на руската инвазија во февруари 2022 година.
Оттогаш, десетици илјади луѓе загинаа, а Русија окупираше петтина од украинската територија во војната, најголемиот воен конфликт во Европа од крајот на Втората светска војна.
Украина и европските земји предложија 30-дневен прекин на огнот минатата недела, а Путин наместо тоа понуди преговори во Истанбул на 15 мај.
Зеленски се согласи, но рече дека ако Путин не е лично присутен, тоа би значело дека тој не е навистина заинтересиран за мир.
„Тоа е негова војна (…) па затоа треба да биде на преговорите“, рече Зеленски.
Делегацијата на Кремљ е предводена од Владимир Медински, тврдокорен помошник на Путин и поранешен министер за култура, кој беше вклучен во преговорите во 2022 година.
Путин, министерот за надворешни работи Сергеј Лавров и помошникот за надворешна политика на Кремљ Јуриј Ушаков, кои се споменуваа како клучни преговарачи откако ги предводеа претходните преговори со САД, не се на списокот на членови на делегацијата.
Медински се смета за многу влијателен во застапувањето на руските историски претензии кон украинската територија.
Заедно со него, на преговорите во Истанбул ќе учествуваат заменик-министерот за надворешни работи Михаил Галузин, заменик-министерот за одбрана Александар Фомин и директорот на Руската воено-разузнавачка агенција (ГРУ) Игор Костјуков.
Европските лидери се закануваат со нови санкции кон Русија доколку преговорите во Истанбул не дадат резултати.
Пред разговорите, Зеленски рече дека ќе одлучи за следните чекори на Украина врз основа на тоа кој ќе ја претставува Русија.
„Украина е подготвена за каков било формат на преговори, не се плашиме да се сретнеме со нив. Утре, во Турција. Чекам да видам кој ќе ја претставува Русија, а потоа ќе одлучам за чекорите што треба да ги преземе Украина“, рече Зеленски во средата.
Русија инсистира прво да се дискутираат „коренските причини“ за конфликтот, вклучувајќи ја „денацификацијата“ и демилитаризацијата на Украина.
Москва, исто така, повторува дека Украина мора да ја отстапи територијата заземена од руските трупи.
Киев тврди дека нема да ја признае освоената територија како руска, но Зеленски призна дека Украина би можела да ја врати само преку дипломатски пат.
Американскиот државен секретар Марко Рубио ќе биде во Истанбул во петок, откако еден ден претходно се сретна со својот украински колега Андрија Сибиг на состанокот на НАТО.
