„Срамота е Македонија да ги зароби граѓаните на територија на која што сме и притоа доколку пробаат да излезат од Македонија, ние не ги пуштаме, заради тоа што Законот е таков, а слободно може да се движат со македонскиот пасош со старото име во рамки на Германија, Швајцарија, Албанија, Косово. Очигледно е дека МВР превзема максимум во рамки на можностите коишто ги има во овој дел, но би сакал да го повторам решението на маките на граѓаните, а тоа решение е 61 пратеник да си ја заработат платата и да стиснат на тоа пусто копче, како што го сменија Законот за безбедност во сообраќајот, така да го сменат и Законот за патните исправи, и да го решат веќе еднаш проблемот на граѓаните“, рече Тошковски одговарајќи на нопвинарско прашање на одбележувањето на Денот на Одделот за заштита на определени личности и објекти при Министерството за внатрешни работи.
Тој ги повика пратениците во Собранието да постапат по тој предлог закон што беше доставен истиот ден заедно со законското решение за возачките дозволи.
„Како што го поминаа Законот за возачките, така и да си го поминат и Законот за пасошите. Само тоа е решение. А граѓаните нека судат. Јас мислам дека граѓаните се многу умни и гледаат дека во споредба со она неработење и непрофесионалност од претходно, сега ако ништо друго даваме максимум од себе“, рече Тошковски.
Тој информира дека пристигнале 20.000 обрасци со новото име на државата.
„Не сакам да отворам теми во јавноста за кои немам точни и информации, но отприлика некаде во осми месец имало договор согласно кој заклучно со 18 февруари во Македонија требало да пристигнат 400.000 обрасци. Тој договор со одреден акт е заменет и притоа заклучно со 18 февруари согласно тој договор е превземена обврска некаде отприлика во декември месец за 22.000 обрасци. Немам уште утврдено со соодветни докази, зошто е така сторено. Но ќе истражиме“, посочи Тошковски.
И дополнителниот заемник министер за внатрешни работи Митко Бојмацалиев ја потврди бројката од пристигнати нови 20.000 обрасци.
„Како што кажа министерот, пристигнати се 20 илјади обрасци и во иднина ќе пристигнат и нови за граѓаните. Кога граѓаните ќе ги добијат готовите документи најави министерот дека ќе ги извести по СМС порака“, изјави Бојмацалиев.
За алатката преку која ќе можат да проверат граѓаните кога се готови документите рече дека не ја најавил тој, туку министерот.
