Ајакс објави дека 36-годишниот Фариоли одлучил да го напушти Ајакс по болната сезона.
Тој имаше договор до јуни 2027 година, но вели дека има различни размислувања со раководството и поради тоа заминува.
„Моето патување во Ајакс започна пред речиси една година, на Де Тоекомст, со цел да го вратиме Ајакс таму каде што му е местото. И заврши на Јохан Кројф Арена, конечно враќајќи го Ајакс во Лигата на шампиони — најголемата сцена на европскиот фудбал. Сакавме да донесеме нова енергија во целата заедница на Ајакс, споделувајќи позитивен начин на работа и размислување на сите нивоа во клубот“.
„Да се биде првиот нехоландски тренер на Ајакс од 1998 година и воедно првиот Италијанец во историјата на клубот беше апсолутна привилегија. Заедно со мојот стручен штаб ја прифативме оваа огромна предизвикувачка задача со почит, одговорност, страст и решителност за успех. Да се заработи почитта и поддршката од навивачите на Ајакс, што ја чувствувавме во текот на целата сезона, значеше многу за мене и мојот тим. Преживеавме неверојатни и незаборавни моменти заедно — уникатна, интензивна и емотивна сезона во која споделивме верба, борбен дух и гордост, конечно остварувајќи ја нашата цел, исполнувајќи ја нашата мисија“.
„Раководството и јас имаме исти цели за иднината на Ајакс, но имаме различни визии и временски рамки околу тоа како треба да работиме и да функционираме за да ги постигнеме тие цели. Имајќи ги предвид овие разлики во принципите и темелите на проектот, длабоко во срцето чувствувам дека ова е најдобриот момент да тргнеме по различни патишта“, изјави Франческо Фариоли.
До пред пет кола до крајот Ајакс имаше убедлива предност пред ПСВ и никој не веруваше дека тимот од Амстердам може да ја прокоцка разликата, но се случи токму тоа. Ајакс врза четири натпревари без победа, а особено болеше ремито против Гронингем кога противникот постигна гол во 99. минута. Холандскиот гигант загуби многу бодови, па вчерашната победа над Твенте беше залудна. ПСВ ја освои титулата со бод повеќе од Ајакс.
