Вардарци веќе ги кројат плановите за наредната сезона.
„Од следната натпреварувачка сезона нов член на Вардар ќе биде полскиот репрезентативец Марек Марцинијак (29). Тој игра на позиција десен бек/десно крило и потпиша двегодишен договор со клубот, до 2027 година“, потврдија од клубот.
Тој во моментов игра за Азоти Пулави, а претходно има настапувано за Жуково, Вибжеже Гдањск и Заглебје Лублин. Ова ќе биде прво негово искуство надвор од Полска.
Марцинијак настапи и на последното СП 2025, и на седум средби постигна 13 гола за Полска. Настапуваше и на последните две квалификациски средби за пласман на ЕП 2026 против Португалија, каде постигна шест гола.
Сезонава во дресот на Азоти Пулави настапи на 23 натпревари од полското првенство, и има 71 погодок од 118 обиди, со 60% на успешност.
Тој ќе биде третиот ракометар од Полска кој играл за Вардар по Патрик Валчак и Јан Чувара.
