Беше познато дека ако Интер Мајами и Палмеирас одиграат нерешено и двете екипи ќе се пласираат во нокаут фазата од СКП.
Меч кој потсети на дуелот меѓу Шведска и Данска кога на двете селекции им беше потребно реми од 2-2, а со тој резултат и заврши мечот.
Дуелот меѓу Интер Мајами и Палмеирас не изгледаше дека е местен, но заврши со резултатот кој им беше потребен и на двете екипи.
Интер Мајами поведе уште во 16. минута со гол на Аленде кој излезе сам пред противничкиот голман и ја смести топката во мрежата.
Водство од 2-0 донесе Луис Суарез по 20 минути игра во второто полувреме.
Интер Мајами водеше со 80. минута кога Паулињо намали на 2-1, а Маурисио седум минути подоцна ги постави конечните 2-2.
Резултатот да беше и поинаков Порто немаше да се пласира во осминафиналето бидејќи не успеа да го победи Ал Ахли, мечот заврши 4-4.
Ал Ахли четирипати водеше, Порто исто толку пати го израмнуваше резултатот.
Абу Али во 15. минута донесе водство за Ал Ахли, но седум минути подоцна Мора изедначи на 1-1.
Во самиот финиш од првиот дел Абу Али даде нов гол, овојпат погоди од пенал и го врати водството на својот тим.
По пет минути игра во вториот дел Вилијам Гомез со убав гол од далечина израмни на 2-2, но веќе во следната минута Абу Али комплетираше хет-трик за предност на Ал Ахли од 3-2.
Но оваа предност траеше само две минути, Саму во 53. минута израмни на 3-3.
Во 64. минута Бен Ромдане донесе предност за Ал Ахли од 4-3, а Пепе во 89. минута ги постави конечните 4-4.
Палмеирас и Интер Мајами со по пет бода продолжуваат понатаму, Порто и Ал Ахли со по два се елиминирани од Светското клупско првенство.
Фото: X/InterMiami
