Египетскиот напаѓач, кој пристигна на „Енфилд“ во 2017 година, остави длабока трага и се искачи на третото место на вечната листа на стрелци, со 255 голови на 453 натпревари.
„За жал, дојде тој ден. Ова е првиот дел од моето збогување. Ќе го напуштам Ливерпул на крајот од сезоната. Никогаш не замислував колку овој клуб, овој град и овие луѓе ќе станат дел од мојот живот. Ливерпул не е само клуб, тоа е страст, историја и дух. Заминувањето никогаш не е лесно. Вие ми ги дадовте најубавите моменти во животот и секогаш ќе бидам еден од вас“, изјави Салах.
Со Ливерпул освои бројни трофеи, меѓу кои Лигата на шампионите и две титули во Премиер лигата, а во изминатиот период настапуваше со променлива форма под водство на Арне Слот. И покрај договорот до 2027 година, двете страни ќе се разделат по крајот на сезоната, со што ќе заврши една ера на „Енфилд“.
