Нов фудбалер на скопскиот клуб е Џастен Крантове, 25 годишен централен дефанзивец од Холандија со потекло од Суринам.
Крантове во ПМФЛ пристигнува од Тренчин, каде што настапуваше од минатиот февруари. Во тековната сезона запиша девет натпревари во словачкиот шампионат, по што се реши за нов предизвик и преселба во македонскиот фудбал.
Неговата кариера започна во Холандија, а во 2018 година се пресели во младинските категории на Лестер Сити. Подоцна беше дел од Слован Либерец, Хумене и Отелос Атиен.
Работнички претходно во овој преоден рок ги ангажираше Фабрис Ондоа, Џејсон Езеб, Аритон Мехмеди, Чарлс Аколатсе, Јован Попзлатанов, Егзон Белица, Никола Пејовиќ и Зија Мерџани, а новиот проект ќе го предводи тренерот Муарем Муарем.
