Претседателката Сиљановска Давкова на олимпијците им го врачи државното знаме кое ќе биде развиорено на олимписките игри и им посака успешен настап во Париз.
„Вие, како македонски спортски амбасадори, со гордост и достоинство бранете ги боите на нашата земја. Ви посакувам успешен настап и достојно претставување во Париз. Јас и сите македонски граѓани сме со вас и навиваме од срце“, им порача претседателката Сиљановска Давкова.
На Летните олимписки игри во Париз ќе отпатуваат шест македонски спортисти: Владимир Егоров – борење, Никола Ѓуретановиќ – пливање, Анастасија Мојсовска – стрелаштво, Еди Шерифовски – џудо, Милијана Релиќ – таеквондо и Дарио Ивановски – атлетика. Македонското знаме на свеченото отворање ќе го носат Ивановски и Релиќ.
На средбата присуствуваа и членови од раководството на Македонскиот Олимписки Kомитет, тренери и спортски судии.
