Оваа сезона е последна со 12 клуба во елитата, од следната доаѓа до кратење и тоа ќе влијае и на термините. Сезонава згуснатиот распоред носи натпревари од ПМФЛ речиси секој ден.
Сепак, тој принцип ќе се промени следната година. Првиот човек на мак-фудбалот Масар Омерагиќ на годишното собрание на ФФМ откри дека ситуацијата ќе се смени.
„Имавме ситуации со четири натпревари од Скопје во ист ден…Сега календарот е густ затоа што следува Мундијалот инаку планот е да се игра само петок, сабота и недела. Токму затоа ќе се игра само викенд и еден или два натпревари сигурно ќе бидат ноќни. Можеби до некаде е тоа причината за малиот број на публика, меѓутоа не е главното затоа што немаше навивачи и минатите години. Наше е да работиме на начин на кој мислиме дека е исправно и да се надеваме дека ќе се полнат трибините. Од наредната сезона кога ќе бидат десет клубови, планот е да се игра само во викендите. Ќе има пет натпревари и ќе можат да се распоредат во повеќе термини вклучувајќи и мечеви под рефлектори“, нагласи претседателот на ФФМ.
Оваа година во ПМФЛ едно коло знае да трае од петок до вторник, но тоа повеќе нема да биде случај во иднина.
