Македонија лошо го почна мечот, по три минути игра беше 7-0 за Швајцарија, а ние првите поени ги дадовме дури во четвртата минута. Но, како одминуваше натпреварот се стабилизиравме. Сепак првиот период им припадна на Швајцарците со 15-11. Во втората четвртина Македонија комплетно го сврте резултатот и на одморот заминавме со наша предност од 36-30.
Имавме фуриозен почеток на вториот дел, дојдовме до 20 поени предност, беше 53-33 за нас. Селекторот Илиевски реши да им даде шанса на сите кошаркари, во последните три минути од третиот дел играше веројатно и најмладата петорка која сме ја имале во една сениорска селекција. До крајот Македонија рутински го приведе мечот за победа од 62-56.
Најефикасен беше Митревски со 15 поени, сите од тројки, а двоцифрен беше уште Вајли со 13.
Утре во истиот термин (19 часот), Македонија и Швајцарија ќе одиграат уште еден меч.
